Read Samoan Old Version Bible – O LE TUSI PAIA SALAMO, 34 Bible Online

SALAMO, 34 - Samoan Old Version Bible – O LE TUSI PAIA bible

SALAMO, 34

¹Ou te faafetai ia Ieova i aso uma lava; e le aunoa ōna viiga i lo‘u gutu.

²E mitamita lo‘u agaga ia Ieova; e faalogologo i ai e ua puapuagaina, ona latou fiafia ai lea.

³Ia outou faaneenee atu ia Ieova faatasi ma a‘u; ma ia tatou vivii faatasi i lona suafa.

⁴Na ou saili atu ia Ieova, ona tali mai ai lea o ia ia te au, ma na laveaiina a‘u ai mea uma na ou fefe ai.

⁵Na latou vaavaai atu ia te ia, ona faaolioliina lea o i latou; e le mā foi o latou mata.

⁶Na valaau atu lenei tagata ua tigaina, ona faafofoga mai ai lea o Ieova, ma na faaola ia te ia i ona puapuaga uma lava.

⁷E to lauapi le agelu a Ieova e siosiomia ai e o matatau ia te ia, e laveai foi o ia ia te i latou.

⁸Ina tofotofo ia outou, ma ia outou iloa e lelei Ieova; amuia lava le tagata o lē faatuatua ia te ia.

⁹O outou na o ona tagata paia, ia outou matatau ia Ieova, auā e leai se mea e mativa ai e ua matatau ia te ia.

¹⁰E oge mea leona taanoa, ma latou fia aai; a e e leai se mea lelei e mativa ai i latou o e saili ia Ieova.

¹¹Le fanau e, ina o mai ia, ina faalogologo mai ia ia te au; ou te a‘oa‘o atu ia te outou ia matatau ia Ieova.

¹²O ai ea le tagata ua manao i le ola, ma ua loto ia tele ona aso, ia iloa ai e ia mea lelei?

¹³Aua ne‘i tautala lou laulaufaiva i upu leaga, ma ou laugutu ne‘i tautala faa‘ole‘ole.

¹⁴Ina ‘alo ese ia i mea leaga, a ia fai mea lelei; ina sailiili atu ia i le filemu, ma tausisi i ai.

¹⁵O fofoga o Ieova o loo faasaga i e amiotonu, e liliu mai foi ona taliga i a latou alaga.

¹⁶A o fofoga o Ieova, o loo faasaga i e fai amio leaga, ina ia tineia le faamanatuina o i latou ai le lalolagi.

¹⁷Ua alalaga e ua amiotonu, ona faafofoga mai ai lea o Ieova; ua ia laveai mai foi ia te i latou ai o latou puapuaga uma.

¹⁸Ua latalata mai Ieova i e ua loto momomo; ua ia faaola foi i e ua loto nutimomoia.

¹⁹E tele lava mea leaga e oo i le ua amiotonu; a e laveaiina o ia e Ieova ai ia mea uma.

²⁰E leoleoina e ia o ona ivi uma; e le gau lava se tasi.

²¹E fasiotia e le malaia le ua amio leaga; o i latou foi e ua ‘ino‘ino i le ua amiotonu e faasalaina i latou.

²²E laveaiina e Ieova o agaga o ana auauna; e le faasalaina foi so latou o e faatuatua ia te ia.