Read Samoan Old Version Bible – O LE TUSI PAIA SALAMO, 36 Bible Online

SALAMO, 36 - Samoan Old Version Bible – O LE TUSI PAIA bible

SALAMO, 36

¹O le upu a le solitulafono ua i le tagata amio leaga, o loo i totonu o lo‘u loto lea; e leai lava sona mata‘u i le Atua.

²Auā o loo faaoleole o ia ia te ia lava, ina ia iloa ana agasala ia inosia ai.

³O ana upu o le agasala ia ma le faa‘ole‘ole; ua tuua e ia le faautauta ma le amio lelei.

⁴O loo mafaufau o ia i le amio leaga i luga o lona moega; ua ia tumau i le ala e le lelei; na te le ‘ino‘ino i le leaga.

⁵Ieova e, o i le lagi lou alofa; ua oo lava i ao lou faamaoni.

⁶E pei o le atu mauga o le Atua lau amiotonu; o le moana sausau au faamasino; Ieova e, ua ola ia te oe tagata atoa ma manu.

⁷Le Atua e, e maeu lava lou alofa, o le mea lea ua faatuatua ai tagata i le paolo o ou apaau.

⁸E malilie i latou i mea lololo ua i lou fale; e te faainumia foi i latou i le vaitafe o au mea faafiafia.

⁹Auā o loo ia te oe le puna o le ola; o lou malamalama matou te iloa ai le malamalama.

¹⁰Ia e faafualoa lou alofa i e ua iloa oe, ma lau amiotonu i e ua faamaoni o latou loto.

¹¹Aua ne‘i oo ia te au le vae o lē faamaualuga; aua foi ne‘i tulieseina a‘u e lima o e ua amio leaga.

¹²Ua pauu e ua fai amio leaga i lea lava mea; ua tuleia lava i latou, ua le toe mafai ai ona tutū i luga.