Read Samoan Old Version Bible – O LE TUSI PAIA SALAMO, 38 Bible Online

SALAMO, 38 - Samoan Old Version Bible – O LE TUSI PAIA bible

SALAMO, 38

¹Ieova e, aua e te aoai mai ia te au i lou toasa; aua foi e te sasa ia te au i lou toasa tele.

²Auā ua o au u fanafana i totonu ia te au, ua mamafa foi lou aao i luga ia te au.

³E leai se itu o lo‘u tino ua sao ona o lo‘u toatamai; e leai se filemu i o‘u ivi ona o a‘u agasala.

⁴Auā ua oo lava a‘u agasala i luga o lo‘u ulu; e pei o se avega mamafa, ua mafatia ai lava a‘u.

⁵Ua elosia o‘u manua; ua alu ae le alou ona o lo‘u valea.

⁶Ua faano‘uno‘uina a‘u; ua ou matuā punou lava i lalo; ou te fealuai ma le eleelea i le aso atoa.

⁷Auā ua tigaina lo‘u manava i le ma‘i vevela; e leai se itu o lo‘u tino ua sao.

⁸Ua ou matuā vaivai, ua ou momomo lava; ou te faataio ona o le oi o lo‘u loto.

⁹Le Alii e, o loo i ou luma lo‘u manao uma; e le lilo foi ia te oe lo‘u mapuitiga.

¹⁰Ua sapotuvale lo‘u fatu manava, ua te‘a lo‘u malosi; o le malamalama foi sa i o‘u mata, ua le ia te au lea.

¹¹Ua tutū mamao a‘u uo ma a‘u aumea mamae i lo‘u malaia; ua tutū mamao foi o i latou matou te tuaoi.

¹²Ua fai mailei o e saili ia ou oti; o i latou foi o e sailiili ia leaga ai a‘u o loo tautala i mea leaga, ma mafaufau i mea faa‘ole‘ole i le aso atoa.

¹³Peitai a‘u nei, ua faapei o se tagata tutuli, ua ou le lagona; po o sē gūgū, ua le tautala lona gutu.

¹⁴O a‘u foi e pei se tagata ua le lagona, e leai foi se upu finau i lona gutu.

¹⁵Auā Ieova e, ou te faamoemoe ia te oe; o oe le Alii e, lo‘u Atua, e te tali mai ai.

¹⁶Auā na ou faapea, ne‘i latou mitamita mai ia te au; pe a mapeva lo‘u vae latou te faasausili mai ia te au.

¹⁷Auā o a‘u nei, e toe ina ou paū; ua lumanai pea ia te au lo‘u tiga.

¹⁸Auā ou te ta‘uta‘uina atu la‘u amio leaga; ou te atuatuvale ona o la‘u agasala.

¹⁹A ua tagata ola i latou o e ita mai ia te au, ua malolosi i latou; ua faatoateleina o e ‘ino‘ino fua mai ia te au.

²⁰O i latou foi o e taui atu le lelei i le leaga, ua latou fai a‘u mo latou fili, auā ou te tausisi i mea lelei.

²¹Ieova e, aua ne‘i e tuuna mai a‘u; lo‘u Atua e, aua e te vavamamao ma a‘u.

²²Le Alii e, lo‘u faaolataga, ia e faataalise mai e fesoasoani mai ia te au.