Read Samoan Old Version Bible – O LE TUSI PAIA SALAMO, 39 Bible Online

SALAMO, 39 - Samoan Old Version Bible – O LE TUSI PAIA bible

SALAMO, 39

¹Na ou faapea, Ou te faaeteete i o‘u ala, ina ne‘i ou agasala i lo‘u laulaufaiva; ou te faaeteete i lo‘u gutu, ou te taofiofi a o i o‘u luma tagata amio leaga.

²Na ou faalologo, ua ou le gagana; na ou le tautala lava i mea lelei; ona faagaeetia ai lea o lo‘u tiga.

³Sa vevela lava lo‘u loto i totonu ia te au; o lo‘u mafaufau foi ua mu ai le afi; ona tautala ai lea o lo‘u laulaufaiva.

⁴Ieova e, ia e faailoa mai ia te au lo‘u iuga, pe se a foi le fua o o‘u aso; ina ia ou iloa pe fia ni aso ua toe ia te au.

⁵Faauta, ua e faia o‘u aso e pei o le lautele o le alofilima; o lo‘u olaga foi, ua peiseai ua leai i ou luma; e moni, o tagata uma a o malolosi e matuā faatauvaa lava i latou, Selā.

⁶E moni, o loo savavali tagata e peiseai o se ata; e moni, ua faaatuatuvaleina fua lava i latou; ua faafaulai e ia le oloa, a e le iloa e ia po o ai e faapotopotoina ai.

⁷O lenei, le Alii e, se a ea se mea ou te faatalitali i ai? O loo ia te oe lo‘u lava faamoemoe.

⁸Ia e laveai mai ia te au ai o‘u solitulafono uma; aua ne‘i faalumaina a‘u e le vale.

⁹Ou te faalologo lava a‘u, ou te le gagana; auā o oe lava na e faia.

¹⁰Ia e taofia lau ta ia te au; ua faaumatia a‘u nei i le sasa mai o lou aao.

¹¹A e sasa i le tagata i aoaiga ona o le agasala, ona e faaumatia ai lea o lona lelei, e pei o le mogamoga ona atia o le ofu; e moni, o tagata uma e faatauvaa lava i latou. Selā.

¹²Ieova e, ia e faafofoga mai i la‘u tatalo, ma liliu mai ou fofoga i la‘u alaga; aua ne‘i e le tali mai i la‘u tagi; auā ou te se tagata ese a‘u i ou luma ma le āumau, e pei o o‘u tamā uma lava.

¹³Ia ‘alo ese ou fofoga ia te au, seia ou malolo ane manū ou te lei alu ese, ma ua leai o a‘u.