Read Samoan Old Version Bible – O LE TUSI PAIA SALAMO, 46 Bible Online

SALAMO, 46 - Samoan Old Version Bible – O LE TUSI PAIA bible

SALAMO, 46

¹O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.

²O le mea lea tatou te le fefefe ai, pe a faaliliuina le lalolagi, ma luluina mauga i totonu o le sami;

³pe a taalili ma sousou ona suāsami, ma faagateteina ai mauga i lona maualuga. Selā.

⁴O le vaitafe, e faafiafia ona magāvai i le aai a le Atua, o le mea paia, o i ai afioaga o lē Silisili ese.

⁵O loo i totonu ia te ia le Atua, e le faagaeetia lava ia, e fesoasoani le Atua ia te ia i le vaveao.

⁶Ua vāvāō nuu ese, ua faagaeetia malo; ua tŭlei mai lona siufofoga, ona liu suāvai lea o le lalolagi.

⁷Ua ia te i tatou Ieova o ‘au; o le Atua o Iakopo o lo tatou ‘olo maualuga ia. Selā.

⁸Ina o mai ia, ina vaavaai i galuega a Ieova, o le ua faia faatafunaga i le lalolagi.

⁹Ua faaiua e ia o taua e oo lava i tulu‘iga o le lalolagi; ua gagau e ia le aufana, ma vavae le tao; ua susunuina foi e ia kariota i le afi.

¹⁰Ina soia, ma ia outou iloa o a‘u lava o le Atua; e viia a‘u i nuu ese, e viia a‘u i le lalolagi.

¹¹Ua ia te i tatou Ieova o ‘au, o le Atua o Iakopo, o lo tatou ‘olo maualuga ia. Selā.