Read Samoan Old Version Bible – O LE TUSI PAIA SALAMO, 48 Bible Online

SALAMO, 48 - Samoan Old Version Bible – O LE TUSI PAIA bible

SALAMO, 48

¹E sili lava Ieova, e tatau foi ona matuā viia o ia i le aai a lo tatou Atua, o lona mauga paia.

²E matagofie le maualuga o le mauga o Siona, e fiafia ai le lalolagi uma, o i le itu i matu, le aai a le Tupu silisili.

³E iloa lava le Atua i ona maota, e fai o ia ma ‘olo maualuga.

⁴Auā faauta, na faapotopoto mai tupu; ua latou o atu faatasi.

⁵Na latou vaavaai mai, ona fememeai ai lea; ua atuatuvale i latou, ona latou vave sosola ese ai lea.

⁶Na maua lava i latou i lea mea i le gatete, o le tiga pei o le fafine a fanau mai.

⁷Ua e lepetia vaa Tasesa i le matagi mai sasae.

⁸E pei ona tatou faalogo atu ai, e faapea ona tatou iloa i le aai a Ieova o ‘au, o le aai a lo tatou Atua; e faatumauina ia e le Atua e oo i le favavau. Selā.

⁹Le Atua e, ua matou mafaufau i lou alofa i totonu o lou malumalu.

¹⁰Le Atua e, e pei o lou suafa, e faapea lou viiga ona oo i tulu‘iga o le lalolagi; ua tumu lou aao taumatau i le amiotonu.

¹¹Ia fiafia le mauga o Siona, ia olioli tamafafine a Iuta, ona o au faamasinoga.

¹²Ina faataamilo ia i Siona, ma ia soo ai, ina faitau ia i ona ‘olo.

¹³Matuā mafaufau ia i lona aupa, ma mātau mai ona maota; ina ia outou talatala atu ai i le tupulaga atali.

¹⁴Auā o lenei Atua, o lo tatou Atua lava ia e faavavau faavavau lava; o ia lava na te ta‘ita‘iina i tatou e oo lava i le oti.