Read Samoan Old Version Bible – O LE TUSI PAIA SALAMO, 49 Bible Online

SALAMO, 49 - Samoan Old Version Bible – O LE TUSI PAIA bible

SALAMO, 49

¹Ina faalogologo mai ia i lenei mea o outou nuu uma; ina uai mai ia o outou taliga o outou uma o e nonofo i le lalolagi;

²o tagatānuu atoa ma alii; o e tamaoaiga faatasi ma e matitiva.

³E tautala lo‘u gutu i le poto; e atamamai foi mafaufauga o lo‘u loto.

⁴Ou te uai atu o‘u taliga i le faataoto, ou te faamatala a‘u upu lilo i le kitara.

⁵Se a le mea ou te fefe ai i aso vale, pe a vagavagaia mai a‘u e le agasala a e lamalama ia te au?

⁶O i latou o e faatuatua i o latou oa, ma mitamita i latou ona o le tele o a latou oloa;

⁷e le mafaia lava e so latou ona faatau i lona uso, pe avatu i le Atua se togiola mo ia,

⁸(auā e matuā faigata le togiola o latou agaga, e le mafaia lava ia e faavavau;)

⁹ina ia ola pea ia e faavavau; ia le iloa e ia le tuugamau.

¹⁰Auā ua iloa e ia e oti tagata popoto, e fano foi le tagata valea atoa ma le vale; ona tuua lea e i latou a latou oa mā nisi.

¹¹O lo latou taofi, e faavavau o latou fale, ma mea e mau ai i latou e augātupulaga ia; ua faaigoa e i latou o latou fanua i o latou lava igoa.

¹²A e le tumau le tagata i lona lelei; e tusa i latou ma manu ona fano.

¹³O lo latou ala lenei, o lo latou lea valea; a ua fiafia e ua mulimuli ia te i latou i a latou upu. Selā

¹⁴Ua tuuina atu i latou e pei o mamoe i le tuugamau; e ‘aina i latou e le oti; e pule e ua amiotonu ia te i latou i le taeao; e mavae lo latou matagofie i le tuugamau, mai le mea latou te mau ai.

¹⁵A e peitai e faaola e le Atua lo‘u agaga ai le pule a le tuugamau; auā na te talia mai a‘u. Selā.

¹⁶Aua e te fefe pe a faatamaoaigaina se tasi, pe a faateleina le mamalu o lona aiga;

¹⁷auā e leai se mea na te avea pe a oti o ia; e le mulimuli ifo ia te ia lona mamalu.

¹⁸E ui ina faaamuia atu o ia i lona agaga ina o ola o ia; e viia foi oe pe a e agalelei oe ia te oe;

¹⁹E oo lava ia i le tupulaga o ona tamā; e le iloa e i latou le malamalama e oo i le faavavau.

²⁰O tagata o loo i le lelei, a e le mafaufau, e tusa i latou ma manu ona fano.