Read Samoan Old Version Bible – O LE TUSI PAIA SALAMO, 51 Bible Online

SALAMO, 51 - Samoan Old Version Bible – O LE TUSI PAIA bible

SALAMO, 51

¹Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea o‘u solitulafono.

²Ia e matuā fufulu mai ia te au i la‘u amio leaga, ma ia e faamamā mai ia te au i la‘u agasala.

³Auā ua ou iloa e ‘au lo‘u solitulafono; e le aunoa foi ona i ai i o‘u luma o la‘u agasala.

⁴Ua ou agasala atu ia te oe, na o oe lava; ua ou faia foi lenei mea leaga i ou luma; e tonu ai oe i lau fetalaiga, e sao foi oe pe a e faamasino.

⁵Faauta, na fanaua a‘u ma le amio leaga; na ou i ai foi i le manava o lo‘u tinā ma le agasala.

⁶Faauta, ua e finagalo i le faamaoni o le loto; ma e faailoa mai ia te au le poto i le mea lilo.

⁷Ia e faamamā ia te au i le isopo, ona mamā ai lea o a‘u; ia e fufulu mai ia te au, ona sinasina ai lea o a‘u e sili i lo le kiona.

⁸Ia ou faalogo mai ia te oe i le olioli ma le fiafia; ina ia fiafia ivi ua e faamomomoina.

⁹Ia ‘alo ou fofoga i a‘u agasala, ma ia e sōloi ese a‘u amio leaga uma.

¹⁰Le Atua e, ia e faia se loto mamā mo a‘u; ma ia e faafouina se loto mau i totonu ia te au.

¹¹Aua e te lafoaiina a‘u i ou luma; aua foi e te aveeseina lou Agaga Paia ia te au.

¹²Ia e faafoisia mai ia te au le olioli o le olataga mai ia te oe; ia e taofimauina foi o a‘u ma le loto fiafia.

¹³Ou te a‘oa‘o atu ai ou ala i e ua solitulafono; ona faaliliuina atu ai lea ia te oe o e ua agasala.

¹⁴Le Atua e, le Atua o lo‘u olataga, ia e laveai mai ia te au ai le sala o le toto; ona pese fiafia ai lea o lo‘u laulaufaiva i le amiotonu mai ia te oe.

¹⁵Le Alii e, ia e faamatala mai o‘u laugutu; ona ta‘uta‘u atu lea e lo‘u gutu lou viiga.

¹⁶Auā ua e le finagalo i se taulaga; ana e finagalo i ai po ua ou avatu lava; ua e le fiafia i se taulaga mu.

¹⁷O taulaga i le Atua, o le loto momomo lea; le Atua e, e te le inosia le loto momomo ma le nutimomoia.

¹⁸Ia e faamanuia mai i Siona i lou finagalo alofa; ia e ati ae pa o Ieusalema.

¹⁹Ona e finagalo ai lea i taulga tonu, o le taulaga mu, ma le taulaga mu uma; ona latou faaee ai lea o povi poa i lau fata faitaulaga.