Read Samoan Old Version Bible – O LE TUSI PAIA SALAMO, 52 Bible Online

SALAMO, 52 - Samoan Old Version Bible – O LE TUSI PAIA bible

SALAMO, 52

¹O oe na le toa, se a le mea e te mitamita ai i le leaga? O loo agalelei le Atua i aso uma lava.

²Ua mafaufau lou laulaufaiva i mea leaga; e fai le pepelo e pei o se tafi maai.

³Ua sili lou manao i le leaga, a e itiiti i le lelei; ua sili lou manao i le tala pepelo, a e itiiti i le upu tonu. Selā.

⁴Le laulaufaiva faa‘ole‘ole e, ua e manao i upu uma e fano ai.

⁵O lea e faaumatia ai oe e faavavau e le Atua; na te aveeseina ma liaiina oe ai le fale ie; na te liaiina foi oe ai le nuu o e ola. Selā.

⁶E iloa atu ai foi e ua amiotonu, ma latou matatau ai, latou te featani ai ia te ia; e faapea atu,

⁷Faauta, o le tagata lea na na le faia le Atua mona malosi, a ua faatuatua ia i le tele o lona oloa; na ia faamalosi i lona leaga.

⁸A o a‘u, ou te pei o se olive ona tāuluulu ola i le fale o le Atua; ou te faatuatua i le alofa o le Atua e faavavau faavavau lava.

⁹Ou te vivii atu ia te oe e faavavau lava, auā na e faia lena mea; ou te faatalitali foi i lou suafa, auā e lelei i luma o ou tagata amio Atua.