Read Samoan Old Version Bible – O LE TUSI PAIA SALAMO, 55 Bible Online

SALAMO, 55 - Samoan Old Version Bible – O LE TUSI PAIA bible

SALAMO, 55

¹Le Atua e, ia e faafofoga mai i la‘u tatalo, aua foi e te liliu ese i la‘u aioi atu.

²Ia faafofoga mai ia te au, ma tali mai ia te au; ua ou faanoanoa i lo‘u mafaufau, ma ou uio;

³ona o le leo o le ua ita mai, ona o le saua o lē amio leaga; auā ua latou faaoo mai ia te au le amio leaga, o le ita lava ua latou faasaua mai ai ia te au.

⁴Ua sapotuvale lo‘u lava loto i totonu ia te au; ua oo mai foi ia te au le mata‘u i le oti.

⁵Ua oo mai lava ia te au le mata‘u ma le gatete; ua matuā faagateteina a‘u.

⁶Ona ou faapea lea, E! Ta fia maua apaau e pei o le lupe, ou te lele ese ai lava, i le ou nofo mau ai.

⁷Faauta, ou te sola mamao atu lava; i le ou nofo ai i le vao. Selā.

⁸Ou te faataalise ona sola o a‘u, ona o le matagi tetele ma le afā.

⁹Le Alii e, ia e faaumatia i latou, ia e vaeluaina a latou taupulepulega; auā ua ou iloa le saua ma le misa i le aai.

¹⁰Ua la siomia o ia i ona pa i le ao ma le po; ua i totonu lava ia te ia le amio leaga ma le malaia;

¹¹ua i totonu lava ia te ia le amio paaā; e le alu ese lava i lona malae le saua ma le amio pepelo.

¹²Auā e le o se fai a‘u mona fili na upuleagaina a‘u; ana se ita mai, po ua ou oono ai; e le o lē ita mai ia te au ua faasausili mai ia te au; ana se ita mai, po ua ou lafi ia te ia;

¹³a o oe lava, o le tagata ta te tutusa ma a‘u; o la‘u uo lava, o le ua ta masani;

¹⁴sa fefaamalieai lava a tā tautalaga, sa tā o gatasi ma le vao tagata i le fale o le Atua.

¹⁵Ia faafuasei atu lava le oti ia te i latou; ia latou o ifo o ola i seoli; auā ua i ai mea leaga i mea o latou nonofo ai, o i totonu ia i latou lava.

¹⁶O a‘u nei, ou te valaau atu i le Atua; o Ieova lava na te faaolaina mai a‘u.

¹⁷O le afiafi, ma le taeao, ma le tutonu o le la, ou te tagi ai, ma ou uio; ona faafofoga mai ai lea o ia i lo‘u leo.

¹⁸Na ia laveai mai ia te au, ia ou filemu ai i le taua sa ia te au; auā e toatele i latou sa ia te au.

¹⁹E faafofoga mai le Atua, na te faatigaina foi i latou; o ia lava lea o loo tietie talu mai le vavau lava. Selā. Auā latou te le āu liliu lava, ma ua latou le matatau i le Atua.

²⁰Ua ia faaoo atu ona lima i e ua nofo lelei ma ia; ua tuumavaega ai o ia.

²¹O lona gutu ua se suāsusu ua to‘a e molemole, a o i lona loto le taua; e sili le malulu o ana upu i le suāuu, a o pelu ua seia lava ia.

²²Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.

²³A o oe, le Atua e, e te lafoina i lalo i latou i le to e fano ai; o tagata ua totolima ma e pepelo, latou te le oo i le tautuluaga o latou aso; a o a‘u, ou te faatuatua lava ia te oe.