Read Samoan Old Version Bible – O LE TUSI PAIA SALAMO, 56 Bible Online

SALAMO, 56 - Samoan Old Version Bible – O LE TUSI PAIA bible

SALAMO, 56

¹Le Atua e, ia e alofa mai ia te au; auā ua naunau tagata i le fia maua o a‘u; ua faasaua mai ia te au i lona fai taua mai i aso uma lava.

²Ua naunau mai i aso fai soo o e ua ita mai ia te au; auā e toatele o e fai taua ia te au ma le faasausili mai.

³O le aso ou te mata‘u ai, ou te faatuatua ai ia te oe.

⁴Ou te mitamita i le Atua ona o lana afioga; ou te faatuatua i le Atua; ou te le fefe i se mea e faia e tagata ia te au.

⁵Ua latou faauigaese i a‘u upu i aso uma lava; ua faasaga mai ia te au o latou mafaufau uma lava ia a‘u leaga ai.

⁶Ua latou faapotopoto, ua latou lalafi, ua latou vaavaai i o‘u tulagāvae; auā ua latou lamalama ia ou oti.

⁷Latou te sao ea ona o le amio leaga? Le Atua e, ia e lafoina i lalo le nuu i lou toasa.

⁸Ua e faitauina lava lo‘u fesolasolatai; ia e utu o‘u loimata i lau fagu; e le o i ai ea i lau tusi?

⁹O le aso ou te valaau atu ai ia te oe, ona liutuaina ai lea o e ua ita mai ia te au; ua ou iloa lenei mea, ua ia te au le Atua.

¹⁰OU te vivii atu i le Atua ona o lana afioga; ou te vivii atu ia Ieova ona o lanaafioga.

¹¹Ua ou faatuatua i le Atua; ou te le fefe i se mea e faia e tagata ia te au.

¹²Le Atua e, o ia te au mea na ou tauto e avatu ai ia te oe; ou te avatu taulaga faafetai ia te oe.

¹³Auā ua e laveaiina a‘u nai le oti; e te le faamalosia ea o‘u vae ne‘i tuleia, ina ia ou savali i luma o le Atua i le malamalama o e ola.