Read Samoan Old Version Bible – O LE TUSI PAIA SALAMO, 57 Bible Online

SALAMO, 57 - Samoan Old Version Bible – O LE TUSI PAIA bible

SALAMO, 57

¹Le Atua e, ia e alofa mai ia te au, ia e alofa mai ia te au; auā ua ou faatuatua lava ia te oe; ou te faatuatua foi i le paolo o ou apaau, seia mavae atu nei mea leaga.

²Ou te valaau atu i le Atua silisili ese; o le Atua lava na te faataunuuina mea uma mo a‘u.

³E auina mai e ia mai le lagi, ma faaola mai ia te au, a o upu leaga mai le ua naunau i le fia maua o a‘u. Selā. E auina mai e le Atua o lona alofa ma lona faamaoni.

⁴Ua i le va o le ona lava a‘u; e taoto lava a‘u i le va o e o mumū mai o latou ita, o le fanau a tagata i latou, o latou nifo o tao ma u fanafana ia, o pelu maai foi o latou laulaufaiva.

⁵Le Atua e, ia faasilisiliina oe i le lagi; ia i ai i le lalolagi uma lou mamalu.

⁶Ua latou saunia se upega i le mea ou te ui ai; ua faavaivai ai lo‘u loto; ua latou elia se lua o‘u lumanai, ua pauu i ai i latou. Selā.

⁷Le Atua e, ua mau lo‘u loto, ua mau lava lo‘u loto; ou te pese lava, ma ou fai pesega.

⁸Ala mai ia lo‘u mamalu, ala mai ia le napeli ma le kitara; ou te ala i le taeao lava.

⁹Le Alii e, ou te vivii atu ia te oe i luma o le nuu; ou te fai pesega ia te oe i luma o tagata.

¹⁰Auā e tele lou alofa ua oo i le lagi, e tele foi lou faamaoni ua oo i ao.

¹¹Le Atua e, ia faasilisiliina oe i le lagi; ia i ai i le lalolagi uma lou mamalu.