Read Samoan Old Version Bible – O LE TUSI PAIA SALAMO, 59 Bible Online

SALAMO, 59 - Samoan Old Version Bible – O LE TUSI PAIA bible

SALAMO, 59

¹Lo‘u Atua e, ia e laveai mai ia te au i e ua ita mai ia te au; ia e faamamalu mai ia te au i e ua laga mai ia te au.

²Ia e laveai mai ia te au i e ua fai amio leaga; ia e faaola mai ia te au i tagata ua totolima.

³Auā faauta mai, ua latou lamalama e fasioti ia te au; ua faapotopoto ē malolosi ia agaleaga mai ia te au; Ieova e, e le ona o lo‘u solitulafono, po o sa‘u agasala.

⁴Ua leai sa‘u pagota, a ua latou taufetuli mai, ma latou sauniuni. Ia e tulai mai e faafetaiai mai ia te au, ma e silasila mai.

⁵O oe foi, Ieova e, le Atua o ‘au, le Atua o Isaraelu, ia e maleifua mai, ma e asiasi ai i nuu ese uma lava; aua ne‘i e alofa atu i se tasi o e amio leaga ma le pepelo. Selā.

⁶Ua latou foi mai i le afiafi, ua latou fetagisi e pei o le ulī, ma latou faataamilo ane i le aai.

⁷Faauta, ua luai mai upu leaga i o latou gutu; ua i ai pelu i o latou laugutu; auā o ai se faalogo ane?

⁸A o oe, Ieova e, e te soisoi ia te i latou; e te tauemu i nuu ese uma lava.

⁹Ou te naunau atu lava ia te oe ona o lona malosi; auā o le Atua o lo‘u ‘olo maualuga ia.

¹⁰O loo ou lumanai lo‘u Atua alofa; e faaali mai ia te au e le Atua le taui o e ita mai ia te au.

¹¹Aua e te fasiotia i latou, ne‘i galo i lo‘u nuu; ia e faafeoai solo ia te i latou i lou lava malosi; ma e lafoina i lalo i latou, le Alii e, lo matou talita.

¹²O le agasala a o latou gutu, o le upu lea ai o latou laugutu, ia maileia lava i latou i lo latou lava faamaualuga; ona o a latou fetuu foi ma a latou tala pepelo ua latou tautala ai.

¹³Ia e faaumatia i latou i le toasa, ia e faaumatia lava, ina ia leai so latou e toe; ia latou iloa o loo pule le Atua ia Iakopo, ia oo lava i tulu‘iga o le lalolagi. Selā.

¹⁴Latou te foi mai i le afiafi, latou te fetagisi e pei o le ulī; ma latou faataamilo ane i le aai.

¹⁵Latou te feoai i le fia aai; ae le maoona, ona latou nonofo ai lea i le po.

¹⁶A o a‘u ou te pese atu i lou malosi; ou te alaga fiafia i le taeao i lou alofa mai; auā na fai oe mo‘u ‘olo maualuga, ma o‘u malu i le aso na puapuagaina ai a‘u.

¹⁷Lo‘u malosi e, ou te fai pesega lava ia te oe; auā o le Atua o lo‘u ‘olo maualuga lea, o le Atua ua alofa mai ia te au.