Read Samoan Old Version Bible – O LE TUSI PAIA SALAMO, 63 Bible Online

SALAMO, 63 - Samoan Old Version Bible – O LE TUSI PAIA bible

SALAMO, 63

¹Le Atua e, o lo‘u Atua lava oe; ou te ala saili ia te oe; ua fia inu lo‘u agaga ia te oe, ua ou matuā naunau atu ia te oe i le nuu naumati, e lailoa ai, e leai ni vai;

²ia ou iloa lou malosi ma lou mamalu, e pei ona ou iloa oe i le malumalu.

³Auā o lou alofa e sili ona lelei lea i le ola; ou te vivii atu lava ia te oe i o‘u laugutu.

⁴O lea ou te faamanū atu ai ia te oe a o ou ola; ou te sii o‘u lima i lou suafa.

⁵E peiseai o le ga‘o ma le mea lololo, ou te ma‘ona ai lava a‘u; e vivii atu foi ia te oe o lo‘u gutu ma o‘u laugutu e alaga fiafia.

⁶A ou manatua oe i lo‘u moega, ou te mafaufau ia te oe i leoleoga i itu po.

⁷Auā na fai oe ma fesoasoani ia te au; ou te olioli foi i le paolo o ou apaau.

⁸Ua pipii atu lava lo‘u loto ia te oe; o lou aao taumatau ua taofiina ai a‘u.

⁹A o i latou o e saili e fasioti ia te au ia ou fano, latou te oo i mea loloto i le eleele.

¹⁰E tuuina atu i latou i le pelu e oti ai; e avea i latou ma tufaaga a alope.

¹¹A o le tupu, e fiafia lava ia i le Atua; e taitasi ma mitamita o e tauto ia te ia; auā e punitia gutu o e tala pepelo.