Read Samoan Old Version Bible – O LE TUSI PAIA SALAMO, 68 Bible Online

SALAMO, 68 - Samoan Old Version Bible – O LE TUSI PAIA bible

SALAMO, 68

¹Ia tulai mai le Atua, ia faataapeapeina e ua ita ia te ia; ia sosola ese foi i ona luma o e ua ‘ino‘ino ia te ia.

²E pei ona lelea o le asu, ia faapea ona e faaleleaina i latou; e pei ona liu suāvai o le pulu i le afi, ia faapea ona fano i luma o le Atua o e amio leaga.

³A ia fiafia o e amiotonu; ia latou olioli lava i luma o le Atua; ia matuā fiafia lava i latou.

⁴Ia outou pepese atu i le Atua, ia fai pesega i lona suafa; ia outou faalaulelei le ala mo lē tietie ma afio atu i le vao; o Ioa o lona suafa lea, ma ia outou olioli i ona luma.

⁵O le Tamā ia o e ua mātuaoti, le na te faamasinoina mo fafine ua oti a latou tane, o le Atua lea o loo i lona afioaga paia.

⁶O le Atua na te faatagatāina e ua ausage; na te aumaia e ua noanoatia i le mea e manuia ai; a o e fouvale, latou te nonofo i le nuu naumati.

⁷Le Atua e, na e muamua atu i lou nuu, na e afio atu i le vao. Selā.

⁸Ona gatete ai lea o le lalolagi, ole lagi foi na tautulu ifo i luma o le Atua; o Sinai lava na gatete ia i luma o le Atua, o le Atua o Isaraelu.

⁹Le Atua e, na e faatotoina ifo le ua tele, o lou tofi sa lailoa, o oe lava na e faamalosia.

¹⁰Sa nofo i ai lau faapotopotoga; le Atua e, o lou alofa na e sauni ai mo le ua puapuagatia.

¹¹Na tŭlei mai le afioga a le Alii; e tele ‘au o e na tala‘iina.

¹²Na sosola tupu o ‘au, na latou sosola lava; o le fafine foi na faamuli na ia tufatufaina le vete.

¹³E ui lava ina taooto outou i le va o ulo, e avea outou e pei o apaau o le lupe e liloia i ario, ma ona fulu e liloia i le auro samasama.

¹⁴Na faataapeapeina ai tupu e Le e ona le malosi uma lava, ona sinasina ai lea e pei o le kiona i Salemoni.

¹⁵O le mauga o Vasana, o le mauga o le Atua lea; o le mauga o Vasana, o le atu mauga lava lea.

¹⁶Le atumauga e, se a le mea tou te lamalama mai ai? O le mauga nei ua finagalo le Atua e afio ai; e mau ai lava Ieova e faavavau.

¹⁷O kariota o le Atua e lua sefulu o afe, e manomano lava; o loo ia te i latou le Alii, e pei ona i ai Sinai i le mea paia.

¹⁸Na e afio ae i le mea maualuga, na e ta‘ita‘i faatagataotaua i le tafeaga; na e maua meaalofa mo tagata, o e fouvale lava, ina ia nofo ai Ioa le Atua.

¹⁹Ia faafetaia le Alii i lea aso ma lea aso; ua faaee avega ia te i tatou, o le Atua o lo tatou olataga ia. Selā.

²⁰O lo tatou Atua, o le Atua o le olataga lea; o Ieova le Alii e ana e faasaoina i le oti.

²¹E moni, o le Atua na te foaina ulu o e ita ia te ia, o le tumuai lauulua o le ua finau i ana agasala.

²²Ua fetalai mai le Alii, Ou te faafoisia mai mai Vasana, ou te faafoisia mai mai le loloto o le sami;

²³ina ia feseuai lou vae i le toto; ia etoeto foi laulaufaiva o āu ulī le toto o e ita ia te oe taitasi uma lava.

²⁴Le Atua e, na latou iloa lou afio atu; o le afio atu o lo‘u Atua, ma lo‘u Tupu i le malumalu.

²⁵Ua muamua o e pepese, ua mulimuli o e ta laaupese; ua i le va taupou ta topa.

²⁶Ia faafetaia le Atua i faapotopotoga, o le Alii lava, outou na ua puna mai ia Isaraelu.

²⁷O i ai Peniamina le uii, o le pule ia i latou; o alii o Iuta ma o latou faipule; o alii o Sepulona atoa ma alii o Nafatali.

²⁸Ua pule mai e lou Atua lou malosi; le Atua e, ia malosi oe i le mea ua e faia mo i matou.

²⁹O tupu latou te avatu mea alofa ia te oe, ona o lou malumalu i Ierusalema.

³⁰Ia e aoai i manu feai o i mea ūa, atoa ma le vao povi malolosi ma tamai povi a le nuu, seia ifo mai ia ma fāsi ario; ia e faataapeapeina le nuu ua naunau i taua.

³¹E o mai alii sili mai Aikupito; e vave ona faaloaloa atu e Aitiope ona lima i le Atua.

³²O outou malo o le lalolagi ina pepese atu ia i le Atua; ia outou fai pesega i le Alii; Selā;

³³o lē tietie atu i lagi o lagi o le vavau; faauta, ua ia tŭlei mai lona siufofoga o le siufofoga malosi.

³⁴Ia outou tuu atu le malosi i le Atua; o loo i luga o Isaraelu lona silisili ese, o loo i ao foi lona malosi.

³⁵Le Atua e, ua matautia oe ai ou afioaga paia; o le Atua o Isaraelu, o ia lea na te tuuina atu le malosi ma le fitafita i lona nuu. Ia faafetaia lava le Atua.