Read Samoan Old Version Bible – O LE TUSI PAIA SALAMO, 69 Bible Online

SALAMO, 69 - Samoan Old Version Bible – O LE TUSI PAIA bible

SALAMO, 69

¹Le Atua e, ia e faaola mai ia te au; auā o a‘u nei, a malemo lava a‘u i le vai.

²O le a a‘u goto i le palapala loloto, e le o i ai se mea e tu ai; ua oo lava a‘u i mea loloto o le vai, ua lofia foi a‘u i le vaitafe.

³Ua lailoa lava a‘u i lo‘u valaau; ua fa lo‘u leo; ua mole lava o‘u mata, a o faatalitali atu a‘u i lo‘u Atua.

⁴O e ua ‘ino‘ino fua mai ia te au, e toatele i latou i o‘u lauulu; e malolosi lava o e fia fasiotia mai a‘u, o e ita fua mai ia te au; o mea na ou le faoa ua ou toe avatua lava.

⁵Le Atua e, o oe lava ua e silafia mai lo‘u valea; e le lilo foi a‘u agasala ia te oe.

⁶Le Alii e, Ieova o ‘au, aua ne‘i faamaina ona o a‘u o e faatalitali atu ia te oe; le Atua o Isaraelu e, aua ne‘i masiasi ona o a‘u o e sailiili ia te oe.

⁷Auā ua faalumaina lava a‘u ona o oe; ua ufitia o‘u mata i le ma.

⁸Ua fai a‘u ma tagata āumau i o‘u uso, ma tagata ese i le fanau a lo‘u tinā.

⁹Auā ua ‘aina lava a‘u i le manao tele i lou fale; ua oo mai foi ia te au faifaiga a e na faifaia oe.

¹⁰Ua ou tagi, ma ou anapogi, ua fai lea ma luma ia te au.

¹¹Na ou ofu i le ie talatala; ona faia lea o a‘u ma upu faatusa a i latou.

¹²Ua upuia a‘u e i latou o e nonofo i le faitotoa, ua fai foi ma pese a e inu ‘ava.

¹³A o a‘u, ou te tatalo ia te oe, Ieova e, i ona po o le alofa; le Atua e, ona o le tele o lou alofa, ia e tali mai ia te au i le faamaoni o le olataga mai ia te oe.

¹⁴Ia e laveai mai ia te au ai le palapala, aua ne‘i ou goto ai; ia laveaiina a‘u i e ua ‘ino‘ino mai ia te au, atoa ma vai loloto.

¹⁵Aua ne‘i lofia a‘u i le vaitafe, aua foi ne‘i tofatumoanaina a‘u i le mea loloto, aua foi ne‘i punitia le gutu o le lua i luga o a‘u.

¹⁶Ieova e, ia e tali mai ia te au, auā e lelei lou alofa mai; ia e liuliu alo mai ia te au, e pei ona tele o lou alofa mutimuti vale.

¹⁷Aua ne‘i ‘alo ou fofoga i lau auauna; auā ua ou puapuagaina; ia vave ona e tali mai ia te au.

¹⁸Ia e faalatalata mai i lo‘u agaga e faaola mai ai; ia e laveai mai ia te au auā o e ita mai ia te au.

¹⁹O oe, ua e silafia le faalumaina o a‘u, ma le faamaina o a‘u, ma lo‘u faamasiasiga; ua i ou luma o i latou uma o e ita mai ia te au.

²⁰O le luma ua momomo ai lo‘u loto, ua ma‘i lava a‘u; ua ou faatalitali foi i se na te faamatalaloto mai, a e leai lava se tasi, ma ni e faamafanafana mai, a e leai se isi na ou maua.

²¹Na latou avane le mea oona e fai ma‘u mea e ‘ai; ua ou fia inu, ona latou avane ai lea o le vineta ou te inu ai.

²²O latou laoai i o latou luma, ia avea lea ma matāsele; o latou filemu foi, ia fai ma mailei.

²³Ia faapouliuligia lava o latou mata, ia latou le mavaavaai ai; ia tetemu o latou sulugatiti e le aunoa.

²⁴Ia sasaaina atu lou toasa ia i latou; ia oo atu lava ia te i latou lou toatamai e matuā tele.

²⁵Ia faatafunaina le mea latou te nonofo ai; aua foi ne‘i i ai sē inofo i o latou fale ie.

²⁶Auā ua latou tuliloa i le na taia lava e oe; ua latou ta‘uta‘u atu le tiga o e ua manunua ia te oe.

²⁷Ia e faaopoopoina atu le agasala i la latou agasala; aua foi ne‘i oo i latou i le amiotonu mai ia te oe.

²⁸Ia sōloia i latou ai le tusi o le ola; aua foi ne‘i tusia i latou faatasi ma e ua amiotonu.

²⁹O a‘u foi ua puapuagatia a‘u, ma ua tiga lava; le Atua e, ia mamalu lava a‘u i le olataga mai ia te oe.

³⁰Ou te vivii atu i le suafa o le Atua i le pese; ou te faaneenee atu foi ia te ia i le viiga.

³¹E sili ona lelei lea ia Ieova i le povi, o le povi taanoa o i ai nifo ma atigivae.

³²E iloa e ua tigaina, ona latou olioli ai lea; ona fiafia ai lea o outou loto, o outou ua saili i le Atua.

³³Auā o loo faafofoga Ieova i e matitiva, e le ‘ino‘ino foi o ia i ona tagata ua noanoatia.

³⁴Ia vivii atu ia te ia le lagi atoa ma le lalolagi; o le sami atoa ma mea uma e tataa ai.

³⁵Auā o le Atua na te faaolaina Siona, na te faatuina foi aai o Iuta; latou te nonofo ai, e fai foi mo i latou.

³⁶E fai foi ma tofi o le fanau a ana auauna; o e alolofa atu i lona suafa e mau ai i latou.