Read Samoan Old Version Bible – O LE TUSI PAIA SALAMO, 7 Bible Online

SALAMO, 7 - Samoan Old Version Bible – O LE TUSI PAIA bible

SALAMO, 7

¹Ieova e, lo‘u Atua, ou te faatuatua lava ia te oe; ia e faaola mai ia te au i e tuliloa mai ia te au uma lava, ma ia e laveaiina a‘u.

²Ne‘i saeia a‘u e ia e pei o se leona, ne‘i faamomomoina a‘u, a e leai se laveai mai.

³Ieova e, lo‘u Atua, afai ua a‘u faia lena mea; pe afai o i o‘u lima se amio leaga;

⁴afai ua ou agaleaga atu i le na ma nofo lelei ma ia; afai ua ou vetea mea a le ua ita fua mai ia te au;

⁵ia tuliloaina a‘u e le ua ita mai, ma ia maua mai a‘u e ia; ia solia foi e ia lo‘u ola i le eleele, ma ia faataatia lo‘u mamalu i le efuefu. Selā.

⁶Ieova e, ia e tulai mai i lou toasa, ia faasilisili oe ona o le ita o e saua mai ia te au; ma ia e maleifua mai ona o a‘u i le faamasinoga ua e fetalai mai ai.

⁷Ona siosiomia ai lea o oe e le faapotopotoga o nuu; ia e foi mai i o latou luga i le mea maualuga.

⁸E faatonuina nuu e Ieova; Ieova e, ia e faamasino ia te au e tusa ma la‘u amiotonu, e tusa foi ma la‘u amio sao.

⁹Ia faaumatia le leaga o e amio leaga; a ia e faatumauina le ua amiotonu; auā e suesue loto ma manatu e le Atua amiotonu.

¹⁰O le Atua o lo‘u talita ia, o le faaola o ia o e ua tonu o latou loto.

¹¹O le Atua, o le faamasino amiotonu o ia; ua toasa foi le Atua i aso uma lava i le ua amio leaga.

¹²Afai e le foi mai o ia, ona faamaai ai lea e ia o lana pelu; ua ia lolou i lana aufana, ma sauni i ai.

¹³Ua ia sauni atu foi ia te ia le auupega e oti ai; na te faia foi ana u fanafana mu.

¹⁴Faauta, ua faatiga o ia i le agasala; ua to foi i le amio leaga, ma na fanauina le pepelo.

¹⁵Ua faia e ia le lua, ua elia lava; a e paū lava o ia i le lua na ia faia.

¹⁶E toe iu atu lona leaga i lona lava ulu, e paū foi lana sauaga i luga o lona tumuai.

¹⁷Ou te vivii atu ia Ieova ona o lana amiotonu; ou te pese atu foi i le suafa o Ieova lē Silisili ese.