Read Samoan Old Version Bible – O LE TUSI PAIA SALAMO, 72 Bible Online

SALAMO, 72 - Samoan Old Version Bible – O LE TUSI PAIA bible

SALAMO, 72

¹Le Atua e, ia e avatua au faamasinoga i le Tupu, ma lau amiotonu i le alo o le Tupu.

²E faamasino e ia lou nuu i le amiotonu, e faamasino foi ma le tonu ou tagata ua puapuagatia.

³E fua mai mauga le manuia mo le nuu, ma mauga iti e fua mai i le amiotonu.

⁴E faamasino e ia o e puapuaga o le nuu; e faaolaina foi e ia le fanau a e ua matitiva, a e faamomomoina e ia o le ua faasaua.

⁵E matatau lava tagata ia te oe a o tumau le la ma le masina, i lea tupulaga ma lea tupulaga.

⁶E alu ifo ia e pei o le ua i le mutia ua seleseleina, e pei o timuga e sūsū ai le eleele.

⁷O lana nofoaiga e tupu olaola mai ai le ua amiotonu; e manuia tele ai, seia leai se masina.

⁸E pule foi o ia e pau mai i le tasi sami e oo atu i le tasi sami; e pau mai le vaitafe e oo atu i tulu‘iga o le lalolagi.

⁹E ifo foi i ona luma o e nonofo i le nuu naumati, e etoeto i le eleele o e ita ia te ia.

¹⁰O tupu o Tasesa, ma nuu tu matafaga latou te avane meaalofa; o tupu o Seepa ma Sepa latou te avane mea foai fua.

¹¹E ifo lava ia te ia o tupu uma lava; e auauna ia te ia o nuu uma.

¹²Auā e laveai e ia o le mativa i lona alaga mai; atoa ma le ua puapuagatia, ma le ua leai sona fesoasoani.

¹³E alofa atu ia i le ua vaivai ma le ua mativa; e faaola lava e ia e ua matitiva.

¹⁴E laveai o ia ia i latou ai le saua ma le faamalo; e silisili foi o latou toto i lona manatu.

¹⁵E soifua lava ia, e avatua foi ia te ia ni auro mai Seepa; e le aunoa ona talosia o ia; e faafetaia o ia i aso uma lava.

¹⁶E taumafa o saito i le nuu i tumutumu lava o mauga; e gasē ona fua e pei o Lepanona; e fuga mai foi tagata o le aai e pei o le vao i le laueleele.

¹⁷E faavavau lava lona suafa; e tumau pea lona suafa a o i ai le la; latou te faaamuia i latou ona o ia; e faaamuia o ia e nuu uma lava.

¹⁸Ia faafetaia Ieova le Atua, o le Atua o Isaraelu, na o ia lava na te faia vavega.

¹⁹Ia viia lava lona suafa mamalu e faavavau lava; ia tumu foi le lalolagi uma i lona mamalu; Amene ma Amene.

²⁰Ua faaiuina tatalo a Tavita le atalii o Iese.