Read Samoan Old Version Bible – O LE TUSI PAIA SALAMO, 73 Bible Online

SALAMO, 73 - Samoan Old Version Bible – O LE TUSI PAIA bible

SALAMO, 73

¹E moni lava, e agalelei mai le Atua ia Isaraelu, o e ua mamā o latou loto.

²A o a‘u nei, o toe ina mapeva o‘u vae; e toetoe lava ina see o‘u vae;

³auā na ou mataua i e vālea; na ou vaai i le manuia o e ua amio leaga.

⁴Auā e leai ni o latou puapuaga e oo i le oti; a ua puputa pea o latou tino.

⁵E le oo ia te i latou puapuaga faatagata ola, e le pesia foi i latou faatasi ma isi tagata.

⁶O le mea lea ua asoa ai i latou i le faamaualuga; o le saua ua fai ma ofu latou te oofu ai.

⁷Ua lululu o latou mata; latou te faasilisili i manatu o le loto.

⁸Ua latou tauemu, ma ua tautala leaga i le saua; ua latou tautala faamaualuga.

⁹Ua upu vale o latou gutu i le lagi; ua feoai foi o latou laulaufaiva i le lalolagi.

¹⁰O le mea lea e foi mai ai lona nuu iinei; e faainumia foi i latou i le vai e tele.

¹¹E faapea a latou, Pe faapefea ona silafia e le Atua? Pe silafia ea e lē Silisili ese?

¹²Faauta, o i latou nei o e amio leaga, e ua manuia i le olaga nei; e faateleina o latou oloa.

¹³E moni lava, ua ou faamamāfuaina lo‘u loto, ma a‘u fafano o‘u lima ina ua ou le sala, a e fai fua lava.

¹⁴Ua taia lava a‘u i aso fai soo, ua aoaiina foi a‘u i taeao uma lava.

¹⁵Afai ou te faapea ane, Ou te ta‘uta‘u atu faapena; faauta, ona ou faa‘ole‘ole lea i le tupulaga o lau fanau.

¹⁶Na ou mafaufau lava ia a‘u iloa lenei mea; o le mea faatiga lava lea i lo‘u manatu;

¹⁷ua oo i le aso na ou alu atu ai i le malumalu o le Atua; ona ou iloa ai lea o lo latou iuga.

¹⁸E moni lava, na e tuuina atu i latou i mea maseesee; na e faapaūina atu i latou i mea faatafunaina.

¹⁹Aue! Ua faafuasei ona faatafunaina o i latou; ua fano i latou, ua faaumatia lava ona o mea matautia.

²⁰E pei o le miti ina o tulai se tasi, e faapea foi oe le Alii i lou maleifua, e te ta‘ufaatauvaaina lo Iatou ata.

²¹Auā na tigaina ai lo‘u loto; na tuia ai foi lo‘u manatu.

²²O a‘u foi, na fai ai a‘u ma vale, ma le le iloa; ua avea a‘u i ou luma e tusa ma le manu vaefa.

²³A o a‘u, e le aunoa ona ta faatasi ma oe; na e taofiina lo‘u lima taumatau.

²⁴E te ta‘ita‘i ia te au i lau pule, a e mulimuli ane e te talia mai a‘u i le manuia.

²⁵O ai ea se ua ia te au i le lagi? E leai foi se tasi i le lalolagi ou te fiafia i ai, na o oe.

²⁶E vaivai lo‘u tino ma lo‘u loto, a o le Atua, o le papa ia o lo‘u loto ma lo‘u tofi e faavavau.

²⁷Auā faauta, e fano lava o e faamamao ma oe; e te faaumatia i latou uma lava o e o ese ia te oe e faitaaga ai.

²⁸A o a‘u nei, ou te faalatalata atu i le Atua ou te lelei ai; ua ou faia le Alii o Ieova ma ou malu, ina ia ou ta‘uina atu o au galuega uma.