Read Samoan Old Version Bible – O LE TUSI PAIA SALAMO, 74 Bible Online

SALAMO, 74 - Samoan Old Version Bible – O LE TUSI PAIA bible

SALAMO, 74

¹Le Atua e, se a le mea ua e lafoaiina mai ai i matou e faavavau? Se a foi le mea e pusa mai ai lou toasa i le lafu mamoe o loo e fagaina?

²Ia e manatua mai lau faapotopotoga na e faatauina anamua; o le aiga o lou tofi na e faaolaina; o lenei mauga o Siona na e afio ai.

³Ia e afio ae i mea ua faatafunaina e faavavau; o e ua ita mai ua faataumaoi mea uma i le malumalu.

⁴Ua pisapisao o e ita ia te oe i totonu o au faapotopotoga; ua latou faatuina o latou faailoga e fai ma faailoga.

⁵Ua iloa i latou, e pei o tagata ona sii ae o mătau i le vao filifili e tuu a‘i.

⁶O lenei, ua uma ai ana mea togitogi, ua lepetia e i latou i mătau ma samala.

⁷Ua latou susunuina lou malumalu i le afi, ua latou solia le malumalu o i ai lou suafa, ua oo i le eleele.

⁸Ua latou faapea ifo i o latou loto, Ia tatou faataumaoi faatasi i latou; ua latou susunuina mea uma i le nuu sa fai ai potopotoga i le Atua.

⁹Ua tatou le iloa o tatou faailoga; e leai foi se toe perofeta; e leai foi so tatou na te iloa pe iu afea nei mea.

¹⁰Le Atua e, e faifai le ua ita mai seia afea? Pe faavavau ea ona ‘ino‘ino i lou suafa le ua ita?

¹¹Se a le mea ua e toe faafoi atu ai lou aao, o lou aao taumatau lava? Ia e to mai ai nai lou fatafata, ia e faaumatia i latou.

¹²A o le Atua, o lo‘u lea Tupu talu anamua; o loo galue e faaola ai i luma o le lalolagi.

¹³Na e vaeluaina le sami i lou mana; na e tu‘imomomoina ulu o tanimo o le sami.

¹⁴O ulu o leviatana na e nutininii ai lava; na e tuuina atu ai e ‘aina e i latou ua nonofo i nuu naumati.

¹⁵O oe lava, na e foaina le vaipuna ma le alia; o oe lava, na mamate ai vaitafe tafe tetele.

¹⁶O loo ia te oe le ao, o loo ia te oe ma le po; o oe lava na e saunia le malamalama ma le la.

¹⁷O oe, na e tuuina tuaoi uma o le lalolagi; o le tausaga vevela ma le tausaga maalili, o oe na e faia.

¹⁸Ia manatua lenei mea, ua faifaia Ieova e i latou ua ita mai; o le nuu valea foi ua latou ‘ino‘ino i lou suafa.

¹⁹Aua e te tuuina atu lau manutagi i le manu feai; aua ne‘i e faagalogaloina pea o ou tagata ua puapuagaina.

²⁰Ia e manatua le feagaiga; auā ua tutumu mea pouliuli o le lalolagi i mea e nofo ai le saua.

²¹Aua ne‘i foi mai ma le mā le ua sauaina; a ia viia lou suafa e le ua puapuagaina ma le ua mativa.

²²Le Atua e, ia e tulai mai, ma e faia lau lava finauga; ia e manatua lou fāiga e le tagata valea i aso uma lava.

²³Aua ne‘i galo ia te oe le leo o e ua ita ia te oe; ua tupu pea lava le vāvāō o e laga atu ia te oe.