Read Samoan Old Version Bible – O LE TUSI PAIA SALAMO, 75 Bible Online

SALAMO, 75 - Samoan Old Version Bible – O LE TUSI PAIA bible

SALAMO, 75

¹Le Atua e, matou te vivii ia te oe; matou te vivii lava; auā ua latalata mai lou suafa; ua ta‘uatua ou vavega.

²Pe a ou oo i ona po na tuu ai, ona a‘u faamasino tonu lea e a‘u.

³Ua liu suāvai le lalolagi atoa ma i latou uma ua nonofo ai; o a‘u nei ou te faatumauina ona poutu. Selā.

⁴Na ou faapea atu i e ua valelea, Aua tou te amio faavalea; na ou fai atu foi i e amio leaga, Aua tou te faamaualugaina lo outou nifo;

⁵aua tou te matuā faamaualuga lo outou nifo; aua tou te tautalatala ma le ūa maaa.

⁶Auā e le o sasae, po o sisifo, po o le vao e i ai mauga, a o le Atua na te faamasinoina;

⁷o ia na te faamaulaloina le tasi, o ia foi na te faaeaina i luga le tasi.

⁸Auā o loo i le aao o Ieova le ipu, ua mūmū foi le auina; ua tumu i le uaina filogia; e liligiina atu foi e ia ai lenei lava ipu; a o ona ‘alu, e tāulia a faainu a‘i o e amio leaga uma i le lalolagi.

⁹A o a‘u, ou te ta‘u atu e faavavau; ou te fai pesega lava i le Atua o Iakopo.

¹⁰O nifo uma foi o e amio leaga, ou te vavaeeseina ia; a e faamaualugaina nifo o lē amiotonu.