Read Samoan Old Version Bible – O LE TUSI PAIA SALAMO, 78 Bible Online

SALAMO, 78 - Samoan Old Version Bible – O LE TUSI PAIA bible

SALAMO, 78

¹Lo‘u nuu e, ia outou faalogologo mai i la‘u tulafono; ia uai mai o outou taliga i upu a lo‘u gutu.

²Ou te tautala atu lava i le faataoto; ou te ta‘u atu mea lilo talu anamuā,

³o mea na tatou faalogologo i ai, ma tatou iloa; na talaina mai foi ia te i tatou e o tatou tamā.

⁴Tatou te le natia ia mea i a latou fanau, a e ta‘uta‘u atu i tupulaga amuli o viiga o Ieova, ma lona malosi, ma ona vavega na na faia.

⁵Ua ia faatuina le tulafono ia Iakopo, ua ia tuuina foi le poloaiga ia Isaraelu, o mea na ia poloai atu ai i o tatou tamā, ina ia latou faailoa ai i a latou fanau;

⁶ina ia iloa ai e le tupulaga amuli, o fanau lava e fanau mai; e tutupu mai i latou, ma ta‘u atu ai i a latou fanau;

⁷ina ia fai le Atua mo latou faatuatuaga; ma ia le galo galuega a le Atua; a ia latou tausi i ana poloaiga;

⁸ina ia le pei o latou tamā i latou, o le tupulaga vaogata ma le fouvale; o le tupulaga na le sauni o latou loto; e lei faamaoni foi o latou loto i le Atua.

⁹O le fanauga a Efaraima ua i ai auupega, e na fanafana i u; na liutua i latou i le aso na tau ai le taua.

¹⁰Na latou le tausia le feagaiga a le Atua, na le mafafai foi ona latou savavali i lana tulafono;

¹¹na latou faagalogaloina foi ana galuega, ma ona vavega na ia faaali ia te i latou.

¹²Na ia faia vavega i luma o latou tamā i le nuu o Aikupito o le laueleele o Soana.

¹³Na ia vavaeina le sami, ma faaui ane ai i latou; na ia faatuina foi le suāsami e pei o se mea maupuepue.

¹⁴Na ia ta‘ita‘i ia te i latou ina o ao i le ao a o le malamalama o le afi na ia ta‘ita‘i ai ia te i latou i le po atoa.

¹⁵Na ia vaevaea papa i le vao; na ia faainu ia i latou e peiseai sa i ai vai loloto.

¹⁶Na ia faaoso foi o vaitafe nai le papa, na ia faatafe ifo le vai e pei o vaitafe.

¹⁷A ua faaopoopo ona toe agasala atu i latou ia te ia, i lo latou faaonoono i lē Silisili ese i le nuu naumati.

¹⁸Na latou tofotofo i le Atua i o latou loto i lo latou ole atu i mea e ‘ai i lo latou tu‘inanau.

¹⁹Na upuia le Atua e i latou; ua faapea a latou, Ua mafaia ea e le Atua ona laulau mai mea e ‘ai i le vao?

²⁰Faauta, na ia taia le papa, ua tafe mai ai le vai; ona oso ai lea i tua o vaitafe; e mafaia foi ea ona foai mai ni mea e ‘ai? E mafaia ea ona aumai o aano o manu mā lona nuu?

²¹O le mea lea na faafofoga mai ai Ieova, ona toasa ai ai lea o ia; na tŭtŭ ai le afi ia Iakopo, na oo ae foi le toatamai ia Isaraelu;

²²auā ua latou le faatuatua i le Atua, ua latou le faalagolago i le olataga mai ia te ia.

²³Na ia poloai i ao mai luga; na ia to mai foi o puipui o le lagi,

²⁴na ia faatotō faaua i luga ia te i latou le manai e aai ai; na ia avatua foi ia te i latou o mea e ‘ai mai le lagi.

²⁵Na aai tagata i le mea e ‘ai a e malolosi; na ia tuuina atu ia te i latou le mea e ‘ai latou te maoona ai.

²⁶Na ia faaoso mai i le lagi le matagi mai sasaē, o lona malosi foi na ia faaagi mai ai le toga.

²⁷Na ia faatotō faaua foi i luga ia te i latou o manu e pei o le efuefu; o manu felelei foi e pei o le oneone i le sami;

²⁸na ia faatotōina ai i totonu i lo latou toagālauapi; e faataaliolio ai i mea sa latou nonofo ai.

²⁹Na latou aai, ona matuā maoona ai lea o i latou; auā na ia avatu ia te i latou o mea na latou tu‘inanau i ai.

³⁰Na le te‘a i latou i le mea na latou tu‘inanau i ai; a o i o latou gutu a latou mea e ‘ai,

³¹ua oo ai ia te i latou le toasa o le Atua, ua fasiotia foi o latou tagata puputa, ma na lafo i lalo taulelea o Isaraelu.

³²E ui lava i ia mea uma, a ua latou agasala pea; e ui lava i ona vavega, a e latou te lei faatuatua lava.

³³Ona faaumatia faaleaoga ai lea e ia o latou olaga, na faaumatia foi o latou tausaga i le atuatuvale.

³⁴Na latou sailiili atu ia te ia ina o fasiotia i latou e ia; ona latou foi ai lea i le sailiili i latou i le Atua.

³⁵Ona latou manatu ifo ai lea o le Atua o lo latou papa ia; o le Atua silisili o ia na te faaolaina i latou.

³⁶A ua latou pepelo ia te ia i o latou gutu, ma ua latou faa‘ole‘ole ia te ia i o latou laulaufaiva.

³⁷E lei tutumau foi o latou loto ia te ia, e lei faamaoni foi latou i lana feagaiga.

³⁸A o ia, ua alofa mutimuti vale, ua ia faamagaloina a latou amio leaga; na ia le faaumatia ai i latou; ua liliu ese faalasi e ia lona toasa, na ia le faatupuina foi lona toatamai atoatoa;

³⁹auā na ia manatua, ua na o tagata lava i latou; o le matagi o loo mavae atu, e le toe foi mai lava.

⁴⁰Na faalasi naua ona latou faaonoono ia te ia i le vao; na latou faalili lava ia te ia i le vao.

⁴¹Na latou toe tofotofo lava i le Atua; ma latou faaonoono i le Paia o Isaraelu.

⁴²Latou te lei manatua lona aao, o le aso na ia faaolaina ai i latou ai le puapuaga;

⁴³o ona faailoga na na faia i Aikupito, atoa ma ona vavega i le laueleele o Soana.

⁴⁴Na ia liua foi o latou vaitafe ma toto, atoa ma o latou vaita‘i, ina ia latou le inu ai.

⁴⁵Na ia aauina atu ia te i latou o garova, na ‘aina ai i latou; o rane foi na faaumatia ai i latou.

⁴⁶Na ia avatua foi o fua o lo latou fanua i le sē kasili, na avatua foi a latou galuega i le sē akerise.

⁴⁷Na ia faamateina o a latou vine i le uato‘a, na ia faamateina foi a latou sukamoru i le uato‘a tetele.

⁴⁸Na ia tuuina atu foi o a latou manu i le uato‘a ma na tuuina a latou lafu mamoe i le uila.

⁴⁹Na ia faaoo ia te i latou o lona toasa mamafa, o le ma‘ema‘eā, le toatamai, ma le puapuaga, i lona aauina atu o auauna e i ai mala.

⁵⁰Ua na saunia le ala o lona toasa; e lei faasaoina e ia o i latou i le oti, a ua tuuina atu o latou ola i le faamai;

⁵¹na ia fasia foi ulumatua uma i Aikupito; o le amataga o lo latou malosi na i fale ie o Hamo.

⁵²Na ia aumaia foi lona nuu e pei o mamoe, ma na ta‘ita‘iina i latou i le vao e pei o se lafu.

⁵³Na ia ta‘ita‘iina i latou ua saogalemu, o lea na le fefefe ai i latou; a o e ua ita i ai, ua lofia i latou i le sami.

⁵⁴Na ia faaoo ia te i latou i lona laueleele paia, o lenei lava mauga na ia maua i lona aao taumatau.

⁵⁵Na ia tulia foi nuu ese i o latou luma, ona vaevaeina atu lea e ia ia te i latou le tofi ua fuatia, ma na faanonofo o itu aiga o Isaraelu i o latou fale ie.

⁵⁶A ua latou tofotofo ma faaonoono i le Atua silisili ese; e lei tausi foi e i latou ana tulafono.

⁵⁷Ua toe liliu i latou, ma faa‘ole‘ole e pei o latou tamā; ua liua i latou e pei o le aufana ua pepelo.

⁵⁸Na latou faalili foi ia te ia i a latou mea maualuluga; na latou faatupuina foi lona fuā i a latou tupua ua ta.

⁵⁹Ua faafofoga le Atua, ona toasa tele ai lea o ia, ona matuā ‘ino‘ino ai lea o ia ia Isaraelu;

⁶⁰na ia lafoai ai le malumalu i Sailo, o le fale fetafai sa mau ai o ia ma tagata.

⁶¹Na ia tuuina atu foi lona malosi ia tāfea, na ia tuuina atu foi lona matagofie i le lima o le ua ita mai.

⁶²Na ia tuuina foi o lona nuu i le pelu, ma ua toasa tele ia i lona lava tofi.

⁶³O latou taulelea ua faaumatia i le afi; o latou taupou foi ua le viia i latou.

⁶⁴O latou faitaulaga, ua oti i latou i le pelu; e lei taufaiaue foi a latou avā.

⁶⁵Ona maleifua ai lea o le Alii e peiseai na tofa, e pei o se tagata malosi ua alaga ona o le uaina.

⁶⁶Ua na taia e ua ita ia te ia i o latou tua; ua na faia lea mo latou luma e faavavau.

⁶⁷Na ia tetee atu foi i le fale ie o Iosefa, na ia le filifilia foi le itu aiga o Efaraima.

⁶⁸A ua ia filifilia le itu aiga o Iuta, o le mauga o Siona na ia finagalo i ai.

⁶⁹Ua na faia foi o lona malumalu e pei o mea maualuluga, e pei o le lalolagi na ia faavaeina e faavavau lava.

⁷⁰Ua na filifilia foi Tavita lana auauna, ma na aumaia o ia nai lotoā mamoe;

⁷¹na ia aumaia o ia sa mulimuli i mamoe fananau, ina ia fafaga lava e ia ia Iakopo lona nuu, o Isaraelu foi lona tofi.

⁷²Na fafaga foi e ia ia te i latou e tusa ma le faamaoni o lona loto; na ia ta‘ita‘i ia te i latou i le poto o ona lima.