Read Samoan Old Version Bible – O LE TUSI PAIA SALAMO, 79 Bible Online

SALAMO, 79 - Samoan Old Version Bible – O LE TUSI PAIA bible

SALAMO, 79

¹Le Atua e, ua oo mai nuu ese i lou tofi; ua latou faaleagaina lou malumalu paia; ua latou faia Ierusalema ma faupuegāmaa.

²Ua latou avatu tino o au auauna ua oti e fai ma mea e ‘ai a manu felelei, ua avatu tino o ou tagata amio Atua i manu feai e tataa.

³Ua latou faamaligi o latou toto e pei o le vai, ua soo ai Ierusalema; na leai foi se na te tanua i latou.

⁴Ua avea i matou ma gao a ē ua matou tuaoi, o ulaga ma tauemuga a e ua vagavagai mai ia te i matou.

⁵Ieova e, e te toasa mai seia afea? E faavavau ea? E mu ea pei o le afi lou fuā?

⁶Ia e sasaaina atu lou toasa tele i nuu ese o e le iloa oe, atoa ma malo o e le valaau i lou suafa.

⁷Auā ua latou ‘aina Iakopo, o le mea foi sa nofo ai o ia ua latou faatafunaina lea.

⁸Aua e te manatua a matou agasala anamua; ia vave ona tomua mai o lou alofa mutimuti vale ia te i matou; auā ua matuā vaivai i matou.

⁹Le Atua o lo matou faaolataga e, ia e fesoasoani mai ia te i matou ona o lou suafa mamalu; ia e laveai mai foi ia te i matou, ma ia e faamagaloina a matou agasala ona o lou suafa.

¹⁰Se a le mea e fai ane ai o nuu ese, O ifea o i ai lo latou Atua? Ia iloa i nuu ese o loo i o matou luma le taui o le toto o au auauna na faamaligiina.

¹¹Ia oo atu ia te oe le auega a le ua fusifusia; e tusa ma lou aao malosi ia e faasaoina e ua tuu e oti;

¹²ma ia e taui faafitu atu i fatafata o e ua matou tuaoi a latou upu na latou faifai ai ia te oe le Alii.

¹³O i matou foi o lou nuu ma le lafu mamoe na e fagaina, matou te vivii ia te oe e faavavau; matou te ta‘uta‘u atu ou viiga i lea tupulaga ma lea tupulaga.