Read Samoan Old Version Bible – O LE TUSI PAIA SALAMO, 8 Bible Online

SALAMO, 8 - Samoan Old Version Bible – O LE TUSI PAIA bible

SALAMO, 8

¹Ieova e, lo matou Alii, e silisili lava lou suafa i le lalolagi uma lava; o oe lava ua e faasilisili lou viiga i le lagi.

²Ua e faatumauina le viiga i gutu o tama meamea ma tama fesusui, ona o e faasaua ia te oe, ina ia faanofosaoina le ua ita ma le ua taui ma sui.

³A ou vaai atu i lou lagi, o le galuega a ou tamatamai lima, o le masina atoa ma fetu na e faia;

⁴se a ea le tagata e te manatu mai ai ia te ia; ma le atalii o le tagata e te asiasi mai ai ia te ia?

⁵Auā ua e faamaulalo ane teisi o ia i agelu; ua e faapaleina foi o ia i le mamalu ma le matagofie.

⁶Ua e foaiina ia te ia le pule i galuega a ou aao; ua e tuuina mea uma i lalo o ona vae;

⁷o lafu mamoe ma povi uma lava, atoa ma manu vaefa o le vao;

⁸o manu felelei, ma i‘a o le sami, ua tataa i ala o le sami.

⁹Ieova e, lo matou Alii, e silisili lava lou suafa i le lalolagi uma lava.