Read Samoan Old Version Bible – O LE TUSI PAIA SALAMO, 80 Bible Online

SALAMO, 80 - Samoan Old Version Bible – O LE TUSI PAIA bible

SALAMO, 80

¹Le leoleo o Isaraelu e, ia e faafofoga mai, o oe o lē ta‘ita‘i ia Iosefa e pei o se lafu mamoe; o oe lē tietie i le va o kerupi, ia e faaali mai lou pupula.

²Ia e faaoso lou malosi i luma o Efaraima, ma Peniamina, ma Manase, ma e afio mai e faaola ia te i matou.

³Le Atua e, ia e faafoisia i matou, ma ia malamalama mai ou fofoga; ona faaolaina ai lea o i matou.

⁴Ieova e, le Atua o ‘au, e pusa mai lou toasa i le tatalo a lou nuu seia afea?

⁵Ua e fafagaina i latou i loimata e fai ma mea e ‘ai, o loimata foi e tele ua e avane ia te i latou e inu ai.

⁶Ua e faia i matou ma mea e famisai ai ē ua matou tuaoi; ua tauemu mai foi ia te i matou o e ita mai ia i matou.

⁷Le Atua o ‘au e, ia e toe faafoisia i matou, ma ia malamalama mai ou fofoga; ona faaolaina ai lea o i matou.

⁸Na e aumaia le vine nai Aikupito; na e tulia nuu ese, ma e totōina ai.

⁹Na e teuteua le laueleele mo lea vine; na e faasosoloina foi ona aa, ua tumu ai le nuu.

¹⁰Ua maluia mauga i lona paolo, o ona la foi e pei o arasi silisili.

¹¹Ua ia faasosolo atu ona lava la e oo atu i le sami, o ona tatupu foi e oo atu i le vaitafe.

¹²Se a le mea na e sōloia ai ona pa, ina ia tau ona fua e i latou uma o e ui ane i le ala?

¹³Ua faataumaoi ai e le puaa mai le vao, o manu foi e tataa latou te aai ai.

¹⁴Le Atua o ‘au e, ia e toe foi mai lava; ia e silasila mai mai le lagi, ma e silafia, ma ia e asiasi i lenei vine,

¹⁵o le pogai lava na totōina e lou aao taumatau, o le atalii foi na e faamalosia mo oe.

¹⁶Ua susunuina i le afi, ua tuu i lalo; e fano i latou i le aoaiga mai ou fofoga.

¹⁷Ia faaee lou aao i luga o le tagata o lou aao taumatau, o le atalii o le tagata na e faamalosia mo oe.

¹⁸Matou te le tuumuli ia te oe; ia e faaola mai ia te i matou, ona matou valaau atu ai lea i lou suafa.

¹⁹Ieova e, le Atua o ‘au, ia e faafoisia i matou; ia malamalama mai ou fofoga; ona faaolaina ai lea o i matou.