Read Samoan Old Version Bible – O LE TUSI PAIA SALAMO, 81 Bible Online

SALAMO, 81 - Samoan Old Version Bible – O LE TUSI PAIA bible

SALAMO, 81

¹Ia outou pepese ma le leo tele i le Atua lo tatou malosi; ia outou alalaga i le Atua o Iakopo.

²Ina usu ia le pese, au mai ia le topa, o le kitara leo mălie, atoa ma le napeli.

³Ia outou ilia le pu i le masina ua faatoa vaaia, o ona po ua tuu e fai ai le tausamiga.

⁴Auā o le tulafono lenei mo Isaraelu, o le pule a le Atua o Iakopo.

⁵Na ia faia lenei mea ma tulafono ia Iosefa, i lona afio atu i le nuu o Aikupito; na ou faalogo ai i le gagana ou te lei iloa.

⁶Na ou tuueseina le avega i lona ua; o le ato ua te‘a ma ona lima.

⁷Na e valaau mai i le puapuaga, ona ou laveaiina ai lea o oe; na ou tali atu ia te oe i le mea lilo ua i ai le faititili; na ou tofotofo ia te oe i le vai o Meripa. Selā.

⁸Lo‘u nuu e, faalogologo mai ia, se‘i ou ta‘utino atu ia te oe; Isaraelu e, e lelei ona e faalogo mai ia te au;

⁹aua ne‘i ai se atua ese ia te oe; aua foi ne‘i e ifo i se atua o se nuu ese.

¹⁰O a‘u lava o Ieova lou Atua, o le na aveina ae ia te oe nai le nuu o Aikupito; faamaga ia lou gutu, ona ou faatumuina ai lea.

¹¹A e lei faalogo mai lo‘u nuu i lo‘u leo; o Isaraelu foi e lei loto mai ia te au.

¹²Ona ou tuuina atu ai lea o i latou i o latou loto finau vale; na latou savavali i mea na latou filifili i ai.

¹³E! A na faalogo mai lo‘u nuu ia te au, ana savavali Isaraelu i o‘u ala;

¹⁴po ua ou vave faatoilaloina e ua ita ia te i latou, ma a‘u faaoo atu lo‘u lima i e ua fai i latou mo latou fili.

¹⁵Po ua faatagā vivii ia te i latou e ua ‘ino‘ino ia Ieova; a e faavavau o latou aso.

¹⁶Po ua fafaga e ia ia te i latou i le saito e sili ona lelei; po ua ou faama‘ona ia te oe i le meli nai le papa.