Read Samoan Old Version Bible – O LE TUSI PAIA SALAMO, 83 Bible Online

SALAMO, 83 - Samoan Old Version Bible – O LE TUSI PAIA bible

SALAMO, 83

¹Le Atua e, aua ne‘i e le fetalai mai; le Atua e, aua ne‘i e le tali mai, aua foi ne‘i e mapu.

²Auā faauta, ua vāvāō o e ua ita ia te oe; o e ua ‘ino‘ino foi ia te oe, ua latou faamaualuluga.

³Ua latou togafiti faalilolilo i lou nuu, ma latou taupulepule i e ua natia e oe.

⁴Ua latou faapea ane, O mai ia, ia tatou faaumatia i latou ia le toe fai ma nuu; ia le toe manatua lava le igoa o Isaraelu.

⁵Auā na latou taupulepule ma le loto gatasi; ua latou fai le feagaiga e tetee atu ia te oe;

⁶o fale ie o Etoma ma sa Isamaelī; o Moapi ma sa Hakarā;

⁷o Kavala, ma Amoni, ma Amaleka; o Filisitia atoa ma e ua nonofo i Turo;

⁸o Asuria foi ua faatasi ma i latou; ua faia i latou ma fesoasoani i le fanauga a Lota. Selā.

⁹Ia e fai ia te i latou e faapei ona e faia ia Mitiana, ma Sesera, ma Iapino i le alia o Kisona.

¹⁰Na faaumatia i latou i Enetoro; na avea i latou ma otaota mo le laueleele.

¹¹Ia e faia o latou alii ia pei o Oreva ma Seeva; ia pei o Seva ma Salemuna foi o latou alii uma;

¹²o e na faapea ane, Ia tatou fai mo i tatou o mea e afio ai le Atua.

¹³Lo‘u Atua e, ia e faia i latou ia pei o le mea faataavalevale; ia pei o le aputi o saito e lelea i le matagi.

¹⁴Ia pei o le afi ona susunu le vaomatua, ia pei o le mumū o le afi ona faamu a‘i mauga;

¹⁵ia faapea ona e tuliloa ia te i latou i lou afā, ia e faaatuatuvale ia te i latou i lou asiosio.

¹⁶Ia e matuā faama ia te i latou; ina ia latou saili i lou suafa, Ieova e.

¹⁷Ia faamaina i latou ma ia faaatuatuvaleina i latou e faavavau faavavau lava; ia masiasi i latou, ma ia fano i latou;

¹⁸ina ia iloa e i latou, o oe, e ou le suafa o IEOVA, na o oe lava o le Silisili ese i le lalolagi uma.