Read Samoan Old Version Bible – O LE TUSI PAIA SALAMO, 86 Bible Online

SALAMO, 86 - Samoan Old Version Bible – O LE TUSI PAIA bible

SALAMO, 86

¹Ieova e, ia liliu mai ou fofoga, ia e faafofoga mai ia te au; auā ua puapuagaina ma ua mativa lava a‘u.

²Ia e leoleoina lo‘u agaga, auā ua amio Atua lava au; o oe na, lo‘u Atua e, ia e faaola mai i lau auauna o le ua faatuatua ia te oe.

³Le Alii e, ia e alofa mai ia te au; auā ou te valaau atu ia te oe i aso uma lava.

⁴Ia e faafiafia mai le loto o lau auauna; auā ua faanaunau atu lo‘u loto ia te oe, le Alii e.

⁵Auā le Alii e, o oe e lelei, ma ua e faamagalo sala; e tele foi lou alofa ia te i latou uma o e valaau atu ia te oe.

⁶Ieova e, ia e faafofoga mai i la‘u tatalo; ma e liliu mai i le leo o la‘u aioi.

⁷O le aso e puapuagaina ai a‘u, ou te valaau atu ai ia te oe; auā e te tali mai ia te au.

⁸Le Alii e, e leai lava so le vao atua e tusa ma oe; e leai foi se galuega e tusa ma au galuega.

⁹O nuu uma na e faia latou te o mai, ma latou ifo atu i ou luma, le Alii e; ma latou faaneenee atu i lou suafa.

¹⁰Auā e sili oe, o loo e fai foi vavega; o le Atua oe, na o oe lava.

¹¹Ieova e, ia e faasino mai ia te au lou ala, ou te savali i le mea moni mai ia te oe; ia e faia ina ia tasi lo‘u loto e mata‘u i lou suafa.

¹²Le Alii e, lo‘u Atua, ou te vivii atu ia te oe i lo‘u loto atoa; ou te faaneenee atu lava i lou suafa e faavavau.

¹³Auā e tele lava lou alofa ia te au; na e laveai mai lo‘u agaga ai seoli e maulalo lava.

¹⁴Le Atua e, ua laga mai ia te au o e faamaualuga, o le faapotopotoga foi o e saua ua latou sailia mai a‘u e fasioti; latou te lei tuuina atu oe i o latou luma.

¹⁵A o oe le Alii e, o le Atua oe lē alofa mutimuti vale ma lē alofa fua, o lē telegese lona toasa, a e tele le alofa ma le faamaoni.

¹⁶Ia e liuliu alo mai ia te au, ma ia e alofa mai ia te au; ia e foai mai lou malosi i lau auauna, ma ia e faaola mai i le tama tane a lau auauna fafine.

¹⁷Ia e faia se faailoga mo a‘u ou te lelei ai; ina ia iloa ai e o ‘ino‘ino mai ia te au, latou te mamā ai; auā o oe, Ieova e, ua e fesoasoani mai ia te au, ma e faamafanafana mai ia te au.