Read Samoan Old Version Bible – O LE TUSI PAIA SALAMO, 88 Bible Online

SALAMO, 88 - Samoan Old Version Bible – O LE TUSI PAIA bible

SALAMO, 88

¹Ieova e, le Atua o lo‘u olataga, ua ou alaga atu i ou luma i le ao ma le po;

²ia oo atu i ou luma la‘u tatalo; ia liliu mai ou fofoga i la‘u valaau;

³auā ua tumu lava lo‘u agaga i mea e tiga ai; ua toe lava ina ou oo i le tuugamau.

⁴Ua ta‘ufaatasiina a‘u ma e ua o ifo i le lua; e tusa a‘u ma le tagata e leai sona malosi;

⁵ua sa‘oloto a‘u faatasi ma e ua oti, e pei o e ua fasia, ua taatitia i le tuugamau, o e ua le toe manatua e oe; o i latou foi ua faateaeseina ma lou aao.

⁶Ua e tuuina ifo a‘u i le lua e maulalo lava, o mea pogisa, o mea loloto lava.

⁷Ua mamafa lou toasa i luga ia te au, o au galu uma ua e faatigaina ai a‘u. Selā.

⁸Ua e ave mamao ia te au o e na matou masani; ua e faainosia a‘u e i latou; ua punitia a‘u, ou te le mafai ona ulufafo.

⁹Ua totō o‘u mata ona o le puapuaga; Ieova e, ua ou valaau atu ia te oe i aso uma, ua ou faaloaloa atu o‘u lima ia te oe.

¹⁰E te faia ea vavega i e ua oti? E tutū mai ea e ua oti e vivii atu ia te oe? Selā.

¹¹E ta‘ua ea lou alofa i le tuugamau? Pe ta‘ua lou faamaoni i le mea e malaia ai?

¹²E iloa ea lou vavega i le pouliuli, ma lau amiotonu i le nuu e galo ai mea?

¹³A o a‘u, Ieova e, na ou alaga atu ia te oe; e tomua foi la‘u tatalo ia te oe i le taeao.

¹⁴Ieova e, se a le mea ua e lafoai mai ai ia te au? Se a le mea e te liliuese ai ou fofoga ia te au?

¹⁵Ua puapuagatia lava a‘u, ma ua toe ina oti talu ina ou taulealea; ua mafatia lava a‘u i āu mea e mata‘u ai, ua ou fememeai.

¹⁶Ua oo mai i o‘u luga lou toasa mamafa; ua faaumatia lava a‘u e āu mea e mata‘u ai.

¹⁷E pei o le vai ona latou siosio mai ai ia te au i le aso atoa; latou te puipui faatasi mai ia te au.

¹⁸O le uo ma le aumea ua e ave mamao ia te au, ua i le pouliuli foi e na matou masani.