Read Samoan Old Version Bible – O LE TUSI PAIA SALAMO, 89 Bible Online

SALAMO, 89 - Samoan Old Version Bible – O LE TUSI PAIA bible

SALAMO, 89

¹O le alofa mai o Ieova ou te pese ai lava e faavavau; ou te faailoa atu i lo‘u gutu lou faamaoni i lea tupulaga ma lea tupulaga.

²Auā na ou faapea ane, E atiina ae le alofa e faavavau lava; o le lagi lava e te faatumauina i ai lou faamaoni.

³Ua ma osia le feagaiga ma le na ou fiilfilia, na ou tauto lava ia Tavita la‘u auauna.

⁴Ou te faatumauina lau fanau e faavavau lava; ou te atiina ae foi lou nofoālii i lea tupulaga ma lea tupulaga. Selā.

⁵Ieova e, e vivii le lagi i ou vavega; e viia foi lou faamaoni i le faapotopotoga o le au paia.

⁶Auā o ai ea i le lagi e faatusaina Ieova? O ai so le fanau a e malolosi e tusa ma Ieova?

⁷O le Atua e tatau ona matautia tele i le faapotopotoga o le au paia; e tatau foi ona matautia o ia e i latou uma o e vagavagai ia te ia.

⁸Ieova e, le Atua o ‘au, o ai sē malosi e tusa ma oe Ioa e? O lou faamaoni foi e siosio ai ia te oe.

⁹O oe lava, e te pule i le faamaualuga o le sami; a sousou ona peau, o oe lava e laolao ai.

¹⁰O oe lava, na e tu‘imomomoina Raava e pei o se ua fasiotia; o lou aao malosi ua e faataapeape ai i e na ita ia te oe.

¹¹E ou le lagi, e ou foi ma le lalolagi; o oe, na e faavaeina le atu laulau atoa ma mea ua tumu ai.

¹²O oe, na e faia le itu i matu ma le itu i toga; o Tapora ma Heremoni la te alaga fiafia lava i lou suafa.

¹³O ia te oe le aao malosi; e malosi lava lou aao, o loo maualuga lou aao taumatau.

¹⁴O le amiotonu ma le faamasinoga o loo tumau ai lou nofoālii; o le alofa ma le faamaoni la te muamua atu i ou luma.

¹⁵Amuia le nuu ua latou lagona le leo fiafia; Ieova e, latou te savavali i le malamalama o ou fofoga.

¹⁶Latou te fiafia lava i lou suafa i aso uma lava; o lau amiotonu foi e maualuluga ai i latou.

¹⁷Auā o oe lo latou matagofie e i ai le malosi; o lou finagalo alofa foi ua faamaualugaina ai lo matou nifo.

¹⁸Auā o lo matou talita o Ieova lava lea; o le Paia foi o Isaraelu, o lo matou tupu lava ia.

¹⁹Ona e fetalai ane ai lea i le faaaliga i lou tagata amio Atua, ma e faapea ane, Ua a‘u tuuina atu le fesoasoani i le ua malosi; ua ou faaeaina le ua filifilia mai le nuu.

²⁰Ua ou maua Tavita la‘u auauna; ua ou faauuina o ia i la‘u uu paia;

²¹o le e tumau ia te ia lo‘u lima; e faamalosia foi o ia e lo‘u lima.

²²E le faasaua ia te ia le ua ita ia te ia; e le faatigaina foi o ia e le tagata amio leaga.

²³Ou te tu‘ipalaina i ona luma e ua ita ia te ia; ou te taia foi e ua ‘ino‘ino ia te ia.

²⁴A e ia te ia lava lo‘u faamaoni ma lo‘u alofa; o lo‘u igoa foi e faamaualugaina ai lona nifo.

²⁵Ou te faaoo atu foi lona lima i le sami ma lona lima taumatau i vaitafe.

²⁶E valaau mai o ia ia te au, O lo‘u Tamā lava oe, o lo‘u Atua, ma le papa o lo‘u olataga.

²⁷O a‘u foi, ou te faia o ia ma ulumatua, e silisili o ia i tupu o le lalolagi.

²⁸E tumau pea lo‘u alofa ia te ia e faavavau, e faamaonia foi la‘u feagaiga ia te ia.

²⁹Ou te tofia lana fanau ia faavavau, o lona nofoālii foi e pei o aso o le lagi.

³⁰Afai e lafoaiina la‘u tulafono e ana fanau, ma latou le savavali i a‘u faamasinoga;

³¹afai latou te solia a‘u tulafono, ma latou le tausia a‘u poloaiga.

³²Ona ou asiasia ai lea o latou solitulafono i le sasa, ou te asiasia foi a latou amio leaga i ta.

³³A o lo‘u alofa e le mavae atu lea ia te ia, ou te le pepelo foi i lo‘u faamaoni.

³⁴Ou te le tuumavaega la‘u feagaiga, ou te le liliu lava le upu ua paū atu i o‘u laugutu.

³⁵Na ou tauto faatasi i lo‘u paia, ou te le pepelo lava ia Tavita.

³⁶E faavavau lava lana fanau, o lona nofoālii foi e pei o le la lea i o‘u luma.

³⁷Pei o le masina e faatumauina ia e faavavau, ma le molimau i le lagi e faamaoni lava. Selā.

³⁸A o oe, ua e teteeina mai ma e inosia mai, ua e matuā toasa mai i le na e faauuina.

³⁹Ua e lafoai le feagaiga a lau auauna; ua e solia lona palealii i le eleele.

⁴⁰Ua e faasoloina ona pa uma lava; ua e faia foi ona ‘olo ma faupuegamaa.

⁴¹Ua vete foi ana mea e i latou uma ua ui ane i le ala; ua faalumaina o ia e i latou ua tuaoi ma ia.

⁴²Ua e faamaualugaina le lima taumatau o e ita ia te ia; ua e faa‘oli‘olia i latou uma o e fai o ia mo latou fili.

⁴³Ua e liliuesea foi le mata o lana pelu, ma ua e le faatumauina o ia i le taua.

⁴⁴Ua e faaiuina lona mamalu, ua e lafo i lalo i le eleele lona nofoālii.

⁴⁵Ua e faapuupuuina aso o lona taulealea; ua e faaofu ia te ia i le mā. Selā.

⁴⁶Ieova e, e te lafi oe seia afea? E faavavau ea? E mu lou toasa e pei o le afi seia afea?

⁴⁷Ia e manatua le puupuu o lo‘u olaga; se a le mea ua e faia ai fua le fanau uma a tagata.

⁴⁸O ai se tagata ola na te le iloa le oti? Na te laveaiina ea lona agaga ai le pule a le tuugamau? Selā.

⁴⁹Le Alii e, o i fea lou alofa anamua, na e tauto ai i lou faamaoni ia Tavita?

⁵⁰Le Alii e, ia e manatua le faalumaina o au auauna; ua ou tauave i lo‘u fatafata upu uma a nuu e tele;

⁵¹ua faaluma mai ai o e ua ita ia te oe Ieova e; ua latou faalumaina ai tulagāvae o le na e faauuina.

⁵²Ia faafetaia Ieova e faavavau lava. Amene ma Amene.