Read Samoan Old Version Bible – O LE TUSI PAIA SALAMO, 91 Bible Online

SALAMO, 91 - Samoan Old Version Bible – O LE TUSI PAIA bible

SALAMO, 91

¹O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava.

²Ou te faapea atu ia Ieova, O lo‘u malu o ia ma lo‘u ‘olo; o lo‘u Atua ou te faatuatua ia te ia.

³Auā o ia na te laveaiina oe i le mailei a lē fai manu, ma le faamai e oti ai.

⁴E ufiufi ifo o ia ia te oe i ona apaau, e te sulufai foi i lalo o ona apaau; e faia lona faamaoni māu talipupuni ma mea e puipuiina ai oe.

⁵E te le mata‘u i le mea matautia i le po, ma le u fanafana e lele i le ao,

⁶o le faamai e fealuai i le pogisa, ma le mala e fano ai i le aoatea.

⁷E pauu se toaafe i ou tafatafa, ma le mano i lou itu taumatau; a e le tāitāi ane ia te oe.

⁸Na ona vaai i ai ou mata, e te iloa atu foi le taui o e amio leaga.

⁹Auā o oe, Ieova e, o lo‘u malu oe, na e faia lē Silisili ese ma mea e te nofo ai;

¹⁰e le oo ia te oe se mea leaga, e le tāitāi ane foi se mala i lou fale ie.

¹¹Auā e poloai atu ia i ana agelu ia te oe, e tausi ia te oe i ou ala uma.

¹²Latou te ave ia te oe i o latou lima, ne‘i tū‘ia lou vae i se maa.

¹³E te solia le leona ma le asipi; e te solia lava le leona taanoa ma le tanimo.

¹⁴Ona ua naunau mai o ia ia te au, o le mea lea ou te faaolaina ai o ia; ou te faamamalu ia te ia ona ua iloa e ia lo‘u igoa.

¹⁵E valaau mai o ia ia te au, ona ou tali atu ai lea ia te ia; o a‘u, ou te ia te ia i le puapuaga; ou te laveaiina o ia, ma ou faatupuina lona mamalu.

¹⁶O le olaga faafualoa e mălie ai o ia ia te au; ou te faaali atu foi ia te ia la‘u faaolataga.