Read Samoan Old Version Bible – O LE TUSI PAIA SALAMO, 94 Bible Online

SALAMO, 94 - Samoan Old Version Bible – O LE TUSI PAIA bible

SALAMO, 94

¹Ieova e, le Atua o lē taui ma sui, le Atua e o lē taui ma sui, ia e faaali mai lou pupula.

²Ia e tulai mai, o oe le faamasino o le lalolagi; ia e tuu atu le taui i e ua faasausili.

³Ieova e, e mitamita seia afea o e amio leaga; e mitamita o e amio leaga seia afea?

⁴Ua latou soona tautala i upu faamaualuga, ua mitamita vale o i latou uma o e fai amio leaga.

⁵Ieova e, ua latou tu‘imomomoina lou nuu, ua latou faatigaina foi lou tofi.

⁶O le fafine ua oti lana tane atoa ma le tagata ese, ua latou fasiotia, ua latou fasiotia foi ma ē mātuaoti;

⁷ma ua faapea a latou, E le silasila mai e Ioa, e le manatua foi e le Atua o Iakopo.

⁸Ia outou iloa, outou e valelea i le nuu; o outou vale foi, tou te popoto afea?

⁹O le na faia le taliga, e le lagona ea e ia? O le na faia le mata, e le silasila atu ea o ia?

¹⁰O lē sasa i nuu ese, e le aoai atu ea e ia? O lē a‘oa‘o i tagata ia popoto.

¹¹O loo silafia e Ieova o mafaufau o tagata, e faatauvaa lava ia.

¹²Ioa e, amuia le tagata ua e aoaiina; ma e a‘oa‘oina o ia i lau tulafono.

¹³Ina ia e tuuina atu se mapu ia te ia i ona po ua puapuaga ai, seia elia le lua mo le ua amio leaga.

¹⁴Auā e le tuuna e Ieova lona nuu, na te le tuulafoaiina foi lona tofi.

¹⁵Auā e toe foi atu le faamasinoga i le amiotonu; e mulimuli atu foi i ai o i latou uma ua loto faamaoni.

¹⁶O ai se tulai mai mo a‘u e tetee i e ua amio leaga? O ai se tu atu mo a‘u e tetee i e ua fai mea leaga?

¹⁷Ana le fesoasoani mai ia te au o Ieova, po ua toe itiiti ona nofo lea o lo‘u agaga i le mea taaligoligoa.

¹⁸Na ou fai ane, O loo mapeva lo‘u vae; ona taofi ae lea o a‘u e lou alofa, Ieova e.

¹⁹O le tele o manatunatu i lo‘u loto ua fiafia ai lo‘u agaga ona o faamafanafanaga mai ia te oe.

²⁰E faatasi ea ma oe le nofoālii o i ai amio leaga, o le ua fai ma tulafono le faatiga?

²¹Ua latou feosofi mai i le agaga o lē amiotonu; ua latou faasalaina le tagata e leai sana agasala.

²²A e faia Ieova mo‘u ‘olo maualuga; o lo‘u Atua foi o le papa lea ou te malu ai.

²³E taui atu foi e ia ia te i latou a latou agasala, na te faaumatia foi i latou i a latou amio leaga; o Ieova lo matou Atua na te faaumatia i latou.