Read Samoan Old Version Bible – O LE TUSI PAIA SALAMO, 96 Bible Online

SALAMO, 96 - Samoan Old Version Bible – O LE TUSI PAIA bible

SALAMO, 96

¹Ia outou pepese atu ia Ieova i le pese fou; le lalolagi uma e, ia outou pepese atu ia Ieova.

²Ia outou pepese atu ia Ieova, ia outou faafetaia lona suafa; ia outou tala‘i atu lana faaolataga i lea aso ma lea aso.

³Ia outou ta‘uta‘u atu lona mamalu i nuu ese, ma ona vavega i nuu uma lava.

⁴Auā e silisili Ieova, e tusa foi ona matuā viia o ia; e sili ona matautia o ia i atua uma.

⁵Auā o atua uma o nuu o tupua lava ia; ao Ieova, na ia faia le lagi.

⁶O loo i ona luma le viiga ma le matagofie; o loo i lona malumalu le malosi ma le mamalu.

⁷Outou o itu aiga o le nuu, ia outou avatua ia Ieova, ia outou avatua ia Ieova le viiga ma le malosi.

⁸Ia outou avatua ia Ieova le viiga o lona suafa; ia outou avatu taulaga, ma outou o atu i ona lotoā.

⁹Ia outou ifo atu ia Ieova i le malumalu e matagofie; ia outou gatete i ona luma le lalolagi uma.

¹⁰Ia outou fai atu i nuu ese, Ua fai Ieova ma tupu; e faatumauina ai le lalolagi ne‘i faagaeetia; na te faamasinotonuina le nuu.

¹¹Ia fiafia le lagi, ia olioli foi le lalolagi; ia taalili mai le sami ma mea ua tumu ai.

¹²Ia fiafia lava le laueleele ma mea uma o i ai; ona alalaga fiafia ai lea o laau uma o i le vao matua, i luma o Ieova;

¹³auā o loo afio mai, auā o loo afio mai e faamasino le lalolagi; na te faamasinoina le atu laulau i le amiotonu, atoa ma nuu i lona faamaoni.