Read Samoan Old Version Bible – O LE TUSI PAIA SALAMO, 97 Bible Online

SALAMO, 97 - Samoan Old Version Bible – O LE TUSI PAIA bible

SALAMO, 97

¹Ua fai Ieova ma tupu; ina olioli ia le lalolagi; ia fiafia le vao nuu o tu matafaga.

²Ua siosiomia o ia i ao ma le pogisa; o le amiotonu ma le faamasinoga o loo tumau ai lona nofoālii.

³Ua muamua i ona luma le afi, e susunu faataaliolio ai e ua ita ia te ia.

⁴O ona uila ua malamalama ai le atu laulau; ua iloa e le lalolagi, ona gatete ai lea.

⁵Ua liu suāvai mauga e pei o le pulu, i luma o Ieova, i luma o le Alii o le lalolagi uma.

⁶O loo faaali mai e le lagi lana amiotonu, o loo iloa atu foi e nuu uma lona mamalu.

⁷Ia mamā i latou uma o e auauna i tupua ua ta, o e ua mitamita i tupua; outou atua uma e, ia outou ifo atu ia te ia.

⁸Ua faalogo Siona ona olioli lea o ia; e fiafia tama fafine a Iuta ona o au faamasinoga Ieova e.

⁹Auā o oe Ieova e, e sili lava oe i le lalolagi uma; e matuā silisili ese lava oe i atua uma lava.

¹⁰Outou e ua alolofa atu ia Ieova, ia outou ‘ino‘ino i mea leaga; o loo tausi e ia i agaga o ona tagata amio Atua; na te laveaiina i latou ai lima o e amio leaga.

¹¹Ua luluina le malamalama mo lē amiotonu, ua luluina foi le olioli mo e ua loto faamaoni.

¹²Outou e ua amiotonu, ia outou fiafia ia Ieova; ia outou vivii pe a manatua lona paia.