Read Samoan Old Version Bible – O LE TUSI PAIA SALAMO, 98 Bible Online

SALAMO, 98 - Samoan Old Version Bible – O LE TUSI PAIA bible

SALAMO, 98

¹Ia outou pepese atu ia Ieova i le pese fou; auā o vavega na na faia; o lona aao taumatau, o lona lava aao paia, ua ia fai ai le olataga.

²Ua faailoa mai e Ieova o lana lava faaolataga; ua ia faaalia lana amiotonu i luma o nuu ese.

³Na ia manatua lona alofa ma lona famaoni i le aiga o Isaraelu; ua iloa e tulu‘iga uma o le lalolagi le olataga mai lo tatou Atua.

⁴Ia alalaga ia Ieova le lalolagi uma; ia leo tele lava, ma ia alalaga fiafia, ma ia fai pesega.

⁵Ia outou fai pesega ia Ieova i le kitara; o le kitara ma le leo o le pese.

⁶O pu ma le leo o le sofao ia outou alalaga ai i luma o Ieova le Tupu.

⁷Ia taalili le sami atoa ma mea ua tumu ai, o le atu laulau atoa ma e o nonofo ai.

⁸Ia pāti lima vaitafe, ia alalaga fāatasi ai mauga ma le fiafia, i luma o Ieova;

⁹auā o loo afio mai o ia e faamasino le lalolagi; na te faamasino le atu laulau ma le amiotonu, atoa ma nuu i le tonu.