Read Samoan Old Version Bible – O LE TUSI PAIA FAATAOTO, 11 Bible Online

FAATAOTO, 11 - Samoan Old Version Bible – O LE TUSI PAIA bible

FAATAOTO, 11

¹O fua faatāutau faaaimago e inosia ia e Ieova; a o le maa e fua a‘i e atoatoa, o lona lea fiafia.

²A sau le faamaualuga, ona sau ai lea o le mā; a o i ai le poto i e faamaulalo.

³O le amio sao a e ua amiotonu e ta‘ita‘iina ai i latou; a o le faapiopio o e amioletonu e fano ai i latou.

⁴E le aoga le oloa i le aso o le toasa; a o le amiotonu, e laveai lea nai le oti.

⁵O le amiotonu a le ua sao e faalauleleiina ai lona ala; a o lana amio leaga, e paū ai le ua amio leaga.

⁶O le amiotonu a e amio sa‘o e laveaiina ai i latou; a o e faapiopio, e maua i latou i a latou amio paaa.

⁷A oti le tagata amio leaga, ua fano lona faatuatuaga; e fano foi le faamoemoe o le tagata amioletonu.

⁸E laveaiina lē amiotonu ai le puapuaga; a e sau lē amio leaga e sui a‘i o ia.

⁹O le gutu o le faalematau e fano ai lē la te tuaoi; a o le poto e laveaiina a‘i ē amiotonu.

¹⁰Ua olioli le aai pe a manuia ē amiotonu; e ofo fiafia foi pe a fano ē amio leaga.

¹¹O le faamanuia o e amio sa‘o e faamamaluina ai le aai; a o gutu o e amio leaga, e lepetia ai.

¹²O le ua leai sona mafaufau na te ‘ino‘ino i lē la te tuaoi; a ua faalologo le tagata mafaufau.

¹³O lē fealuai ma feaveaveai, na te faaali upu faalilo; a o le ua loto faamaoni na te tanutanumai le upu.

¹⁴A leai sē pule, ua malaia le nuu; a o le toatele o faipule, e saogalemu ai.

¹⁵E matuā tigaina le ua fai ma moni o le tagata ese; a o le ua ‘ino‘ino i e fetagofi i lima mo isi, e filemu lava o ia.

¹⁶E maua le mamalu e le fafine matagofie; a o tane malolosi e maua le oloa.

¹⁷O le tagata alofa ua agalelei o ia ia te ia lava; a o le ua saua, na te faatigaina lona lava tino.

¹⁸O lē amio leaga ua fai e ia le galuega pepelo; a o lē totō le amiotonu e ia te ia le taui faamaoni.

¹⁹E pei ona iu o le amiotonu i le ola, e faapea foi le ua tausisi i le leaga, e iu lea i lona lava oti.

²⁰Ua inosia e Ieova e ua faapiopio o latou loto; a o e ua sao a latou amio, e fiafia i ai o ia.

²¹E tago lea lima i lea lima, a e le faasaoina le ua amio leaga; a o le fanau a e amiotonu, e sao i latou.

²²O le mama auro i le isu o le puaa, o le fafine lalelei lea ua te‘a ma le mafaufau.

²³O le manao o e amiotonu, ua na ona lelei lea; a o le faatuatuaga o e amio leaga, e iu lea i le toasa.

²⁴O i ai le na te faasalalauina ana mea, a e atili ai ona mau mea; o i ai foi le ua taofi ana mea, e sili i le mea ua tatau ai, a e mativa ai o ia.

²⁵E faatamaoaigaina le tagata matamau; o ia foi lē faasūsū i nisi, e faasūsūina lava o ia.

²⁶O le na te taofia saito, e fetuuina o ia e le nuu; a e i ai le faamanuia i luga o le ulu o le na te faatauina mai ai.

²⁷O le na sailiili i le lelei, na te sailia le alofa; a o le na te sailia le leaga, e oo lava lea ia te ia.

²⁸O le na te te faatuatua i lona oloa, e paū lava o ia; a o e amiotonu, e tupu matagofie i latou, pei o lau laau.

²⁹O le na te faatigaina lona aiga, e fai mona tofi le matagi; e auauna foi le vale i le ua poto lona loto.

³⁰O le fua o le amiotonu, o le laau o le ola lea; ma le na te maua agaga, e poto ia.

³¹Faauta, e tauia le amiotonu i le lalolagi; e sili foi ona tauia o lē amio leaga ma lē agasala?