Read Samoan Old Version Bible – O LE TUSI PAIA FAATAOTO, 17 Bible Online

FAATAOTO, 17 - Samoan Old Version Bible – O LE TUSI PAIA bible

FAATAOTO, 17

¹E lelei si fāsi mea e ‘ai ua magumagu, a o i ai le filemu; a e leaga le fale ua tumu i manu ua fasia, a o i ai le misa.

²E pule le auauna poto i le atalii na te faatupu le mā; e fai lona veaga o le tofi faatasi ma le au uso.

³E fai le ipu e tunu ai le ario, ma le ogaumu e tunu ai le auro; a o Ieova, na te tofotofoina loto.

⁴O lē fai mea leaga, ua uai atu ona taliga i laugutu leaga; o le tala pepelo e faalogo o ia i le laulaufaiva upu paaa.

⁵O le ua tauemu i le tagata mativa, e faifaia e ia Le na faia o ia; o le ua fiafia i le mala, e le faasaoina o ia.

⁶O le pale o toeaina, o fanau a latou fanau ia; o le faamatagofie o le fanau, o latou tamā ia.

⁷E le ono i laugutu o le vale ona tautala i mea e sili ona lelei; a e matuā le ono laugutu pepelo i le alii.

⁸O le mea alofa, o le maa matagofie lea i le ua i ai; o mea uma e faasaga i ai, e manuia ai.

⁹O le ua ufiufi le soliga o le tulafono, na te sailia le alofa; a o le ua toe ta‘u le mea, na te faateaeseina uo.

¹⁰E sili ona ogoogo o le aoaiga i le tagata mafaufau, i ta e selau i le vale.

¹¹Ua na o le leaga e sailia e le ua fouvale; a e auina atu ia te ia le auauna saua.

¹²Ia fetaiai ma le tagata se urosa ua avea lana toloai; a e aua le fetaiai ma le vale i lona valea.

¹³O le na te taui atu le lelei le leaga, e le te‘a le leaga i lona aiga.

¹⁴O le amataga o le finauga, o le tuuina atu lea o le vai; o le mea lea ina tuu ai ia le misa, manū ua le tupu tele.

¹⁵O le na te ta‘uamiotonu atu i le ua amio leaga, ma le ua faasala i le ua amiotonu, e faatau inosia i laua e Ieova.

¹⁶E i ai i se a le taui i le lima o le vale e maua ai e ia le poto, a ua leai sona loto i ai?

¹⁷E alofa le uo i aso uma lava; a e fanau le uso mo le aso vale.

¹⁸O le tagata ua leai sona mafaufau, ua fetagofi o laua lima ma le tasi; ua fai o ia ma moni i luma o lana uo.

¹⁹O le ua manao i le soliga o le tulafono, ua manao lea i le misa; o le ua faamaualugaina lona faitotoa, ua saili o ia le malaia.

²⁰O le ua i ai le loto faapiopio, e le maua e ia se lelei; ma le ua faa‘ole‘ole lona laulaufaiva, e paū ia i le leaga.

²¹O le na te fanaua le vale, e fai lea mona faanoanoaga; e leai foi se fiafia i le tamā o le ulavale.

²²O le loto fiafia, e fai ma vailaau aoga lea; a o le loto faanoanoa e mamago ai ivi.

²³E talia e le tagata amio leaga le mea alofa nai le fatafata, ina ia faaliliu ese e ia ala o le faamasinoga.

²⁴O loo i ai i le tagata mafaufau le poto; a o mata o le vale, ua i le tuluiga o le lalolagi ia.

²⁵O le atalii valea o le faatiga loto lea i lona tamā; o le faaonoono foi i le na fanau mai o ia.

²⁶E le lelei ona faasala i le ua amiotonu; e le lelei foi ona fasi i alii ona o le amio sa‘o.

²⁷O le ua i ai le poto, e taofia e ia ana upu; o le ua agamalu foi, o le tagata faautauta lea.

²⁸O le vale lava, a faalologo o ia, fa tagata, o ia ua poto; o le ua pupuni ona laugutu, fa tagata, o le tagata mafaufau ia.