Read Samoan Old Version Bible – O LE TUSI PAIA FAATAOTO, 21 Bible Online

FAATAOTO, 21 - Samoan Old Version Bible – O LE TUSI PAIA bible

FAATAOTO, 21

¹O le finagalo o le tupu, o vaita‘i ia i le aao o Ieova; na te liliuina i mea uma ua ia finagalo i ai.

²O ala uma o le tagata e tonu ia i lona lava manatu; a o Ieova, na te fuatia loto.

³Ia faia le amiotonu ma le faamasinoga; e sili ona lelei o lea ia Ieova i le taulaga.

⁴O mata faasiasia, ma le loto fefete, o le lamepa foi a e amio leaga, o le agasala lea.

⁵O mafaufauga o e filigā i galuega, na o le mau mea e iu i ai; a o mafaufauga o e faataalise uma lava, e iu ai na o le mativa.

⁶O le faupuegāoloa ua maua i le laulaufaiva pepelo, o le mea faatauvaa lea ua faataapeapeina e i latou o sailiili i le oti.

⁷O le saua o e amio leaga e aveesea ai i latou; auā ua latou le mafafai ona faia o le faamasinoga.

⁸E faapiopio ma ui ese le ala o tagata; a o le ua lelei, e tonu lana galuega.

⁹E lelei ona nofo i le tumutumu i luga o le fale; a e leaga ona nofo ma le fafine faamisa i le fale tele.

¹⁰O le loto o lē amio leaga, ua mamao lea i le leaga; e le alofagia e ia lē la te tuaoi.

¹¹A faasalaina le ua tauemu, ua faapotoina ai le ua faigofie; a a‘oa‘oina foi le tagata poto, na te maua le poto.

¹²Ua mafaufau lē amiotonu i le aiga o lē amio leaga; o loo ua lafotuina e ua amio leaga ona o lo latou leaga.

¹³O le na te punitia ona taliga i le valaau a le tagata mativa, e valaau lava o ia, a e le talia.

¹⁴O le mea foai faalilolilo, e lomia a‘i le ita; o le taui foi i le fatafata, e lomia a‘i le ita tele.

¹⁵O i ai le fiafia i le ua amiotonu i lona faia o mea tonu; a e malaia o e fai mea leaga.

¹⁶O le tagata ua sese nai le ala o le mafaufau, e tumau o ia i le faapotopotoga o agaga o e ua oti.

¹⁷O le tagata mativa ua manao i mea faafiafia, o le ua manao i le uaina, ma le suāuu, e le mauoa ia.

¹⁸E fai ma togiola mo lē amiotonu le ua amio leaga; e fai foi ma sui o e amio sa‘o e ua amio faapiopio.

¹⁹E lelei na nofo i le vao, a e leaga ona nofo ma le fafine faamisa ma le faaitaitagofie.

²⁰O le oloa tāua ma le suāuu, o loo i ai ia i le fale o le tagata poto; a o le tagata valea, na te faamāumauina ia mea.

²¹O le ua tausisi i le amiotonu ma le alofa, e maua e ia le ola, ma le amiotonu, ma le viiga.

²²E aea e le tagata poto le aai a e totoa; na te lafotuina foi le malosi latou te faatuatua i ai.

²³O le ua leoleo i lona gutu ma lona laulaufaiva, e tausi o ia ia te ia ai puapuaga.

²⁴O le faatauemu faamaualuga ma le faafefeteina, o le igoa lea o le ua fai lona ita ma le faamaualuga.

²⁵O le manao o le paie e oti ai o ia; auā e le mafafai ona lima ona galulue;

²⁶ua tu‘inanau lava o ia i aso uma; a o le ua amiotonu, e foai lava e ia, na te le taofia foi se mea.

²⁷O le taulaga a e amio leaga, e inosia lea; a e atili ai pe a aumaia ma le manatu leaga.

²⁸O le molimau pepelo, e fano lava ia; a o le tagata sa faalogologo i lea mea, e tautala faamaoni ia.

²⁹O le tagata amio leaga, ua matafaalemā o ia; a o lē amio sa‘o, o ia lava na te mafaufau i lona ala.

³⁰E leai lava se poto, e leai se mafaufau, e leai se pule e tetee atu ia Ieova.

³¹Ua saunia le solofanua mo le aso o le taua; a o le faaolataga, o loo ia Ieova lea.