Read Samoan Old Version Bible – O LE TUSI PAIA FAATAOTO, 3 Bible Online

FAATAOTO, 3 - Samoan Old Version Bible – O LE TUSI PAIA bible

FAATAOTO, 3

¹Lo‘u atalii e, aua ne‘i galo ia te oe la‘u tulafono; a ia tausia a‘u poloaiga i lou loto.

²Auā e faaopoopoina ai ia te oe o aso e tele, ma tausaga e te ola ai, atoa ma le manuia.

³Aua ne‘i te‘a ma oe le alofa ma le faamaoni, ia asoa ai i lou ua; ia e tusi ai i le papa o lou loto;

⁴ona e maua ai lea o le alofa ma le manuia lelei i luma o le Atua, atoa ma tagata.

⁵Ia e faatuatua ia Ieova ma lou loto atoa; a e aua le faalagolago i lou lava atamai.

⁶Ia e manatua o ia i ou ala uma, ona faatonuina ai lea e ia lava ou ala.

⁷Aua e te faafiapoto; ia e mata‘u ia Ieova, ia ‘alo ese i le leaga;

⁸e fai lea ma mea e malosi ai lou pute, ma mea e su ai ou ivi.

⁹Ia e ava ia Ieova i lou oa, ma le faapolopolo o au mea uma e tutupu;

¹⁰ona tutumu ai lea ou fale saito i le mau; e feosofi foi au tuugāuaina i le uaina fou.

¹¹Lo‘u atalii e, aua le faatauvaa ia te oe le aoaiga a Ieova; aua foi e te ‘ino‘ino pe a aoaiina oe e ia.

¹²Auā o le ua alofagia e Ieova, e aoaiina o ia e ia; e pei o le tamā ona aoaiina o lona atalii ua ia fiafia i ai.

¹³Amuia le tagata na te maua le poto, ma le tagata na te maua le mafaufau;

¹⁴auā e sili ona lelei o lona faatau i lo le faatau o le ario; ma mea e maua ai e sili lea i le auro.

¹⁵E sili ona lelei o ia i penina; ma au mea faafiafia uma lava e le tusa ma ia.

¹⁶O loo i lona lima taumatau le ola tulu‘i; a o i lona lima tauagavale le oloa ma le viiga.

¹⁷O ona ala o ala matagofie; ma ona magāala uma o i ai le manuia.

¹⁸O ia o le laau o le ola i e tago atu ia te ia; amuia foi i latou o e taofi atu ia te ia.

¹⁹O le poto na faavaeina ai e Ieova le lalolagi; ua faatumauina le lagi i le mafaufau.

²⁰O lona poto ua vaeluaina ai moana; o ao foi ua toulu ai le sau.

²¹Lo‘u atalii e, aua ne‘i te‘a ese nei mea i ou luma; ia e taofi mau i le poto ma le mafaufau;

²²e fai ia mea ma ola o lou agaga, ma mea matagofie i lou ua.

²³Ona e savali ai lea ma le saogalemu i lou ala; e le tu‘ia foi lou vae;

²⁴a ē taoto e te le fefe; e te taoto lava, e mălie foi au moe.

²⁵Aua e te mata‘u i le fefe faafuasei, ma le malaia o e amio leaga, pe a oo mai.

²⁶Auā o Ieova, e fai o ia mou faatuatuaga; na te leoleo foi i lou vae, ne‘i maua.

²⁷Aua ne‘i e faafiti se mea lelei i e ua tatau i ai, pe a ua e mafai ona faia.

²⁸Aua ne‘i e fai atu i lē lua te tuaoi, Alu ia, ina toe sau, a taeao, ona ou avatu ai lea; a o loo i ai lava le mea ia te oe.

²⁹Aua ne‘i e fai togafiti e leaga ai lē lua te tuaoi; a o ia o loo nofo faatalanoa faatasi ma oe.

³⁰Aua ne‘i finau fua ma se tasi tagata; afai ua na le faia se mea leaga ia te oe.

³¹Aua e te mataua i le tagata faasaua; aua foi e te filifili i se tasi o ona ala.

³²Auā e inosia e Ieova le tagata agapiopio; a e fefaauoai o ia ma e ua sao a latou amio.

³³O le fetuu a Ieova o loo i le fale o lē amio leaga; a ua faamanuia e ia le mea e nofo ai ē amiotonu.

³⁴O e tauemu e tauemua foi i latou e ia; a e foai mai e ia le alofa tunoa i e agamalu.

³⁵O e popoto e fai mo latou tofi le viiga; a o e valelea, e fai mo latou tomai le mā.