Read Samoan Old Version Bible – O LE TUSI PAIA FAATAOTO, 30 Bible Online

FAATAOTO, 30 - Samoan Old Version Bible – O LE TUSI PAIA bible

FAATAOTO, 30

¹O upu a Akuru le atalii o Iake; o le valoaga na fai atu ai le tagata ia Itielu, o Itielu atoa ma Ukala.

²O a‘u nei lava, e sili ona valea o a‘u i tagata uma; e le ia te au le atamai o tagata.

³Ua le a‘oa‘oina foi a‘u i le poto; ua ou le iloa foi le poto i mea paia.

⁴O ai ea ua alu ae i le lagi, ma toe ifoifo? O ai ea ua faapotopotoina le matagi i ona lima? O ai ea ua fusifusi vai i le ofu? O ai ea na faatuina tuluiga uma o le lalolagi? O ai ea lona igoa? o ai foi le igoa o lona atalii, pe afai ua e iloa?

⁵O afioga uma a le Atua, ua se ario ua te‘a ma le otaota ia; o le talita lava o ia i e faatuatua ia te ia.

⁶Aua e te faaopoopo se upu i ana afioga; ne‘i aoai atu o ia ia te oe, ona ta‘upepeloina ai lea o oe.

⁷O mea e lua ua ou ole atu ai ia te oe; aua e te faafiti mai ai ia te au, manū ou te lei oti;

⁸o mea faatauvaa ma upu pepelo, ia faamamao ia ia te au; aua e te tuu mai ia te au le mativa po o le mauoa; ia e fafaga mai ia te au i ni mea e ‘ai e tatau ma a‘u;

⁹ina ne‘i ou matuā ma‘ona, ona ou faafiti lea, ma ou faapea, O ai ea Ieova? ina ne‘i ou mativa foi, ma ou gaoi, ma ou ta‘ufuaina le suafa o lo‘u Atua.

¹⁰Aua e te faaleaga le auauna i lona alii; ina ne‘i fetuu o ia ia te oe, ma e nofo sala.

¹¹O i ai le tupulaga e fetuu i lo latou tamā, ma latou le faamanuia i lo latou tinā.

¹²O i ai le tupulaga, fa te i latou ua latou mamā; a e lei fufuluesea o latou eleele.

¹³O i ai le tupulaga e faasiasia naua o latou mata, ma faamaualugaina o latou laumata.

¹⁴O i ai le tupulaga, o pelu o latou nifo, ma polo o latou nifo tuimanu; e aai ai i ē puapuagatia i le nuu, atoa ma tagata matitiva.

¹⁵E toalua afafine o le aluka, o loo fai mai, Au mai, au mai. E tolu mea e le maoona; o mea e fa ua le fai mai, Soia;

¹⁶o le tuugamau, o le manava ua le fanau, o le eleele e le malie i vai, ma le afi ua le fai mai, Soia.

¹⁷O mata ua tauemu i le tamā, ma ‘ino‘ino ona usiusitai i le tinā, e salia ia e oreva o le vanu, e ‘aina e tamai aeto.

¹⁸E tolu mea ua faigata ia te au; o mea lava e fa ou te le iloa;

¹⁹o le ala o le aeto i le lagi; o le ala o le gata i luga o le papa; o le ala o le vaa i totonu o le sami; ma le ala o le tane i le taupou;

²⁰o loo faapea lava le ala o le fafine mulilua; ua ‘ai o ia, ma sōloi i lona gutu, ona faapea ane ai lea o ia, Ua ou le faia se mea leaga.

²¹O mea e tolu ua faagateteina ai le lalolagi; o mea lava e fa na te le lavā onosai ai;

²²o le auauna pe a pule o ia; ma le vale pe a ma‘ona o ia i mea e ‘ai;

²³o le fafine inosia pe a nofo tane o ia; ma le auauna fafine pe a tuliesea e ia lona matai fafine.

²⁴O mea e fa ua laiti i le lalolagi, a e sili ona popoto o i latou;

²⁵o loi, o le nuu e le malolosi ia, a e saunia e i latou a latou mea e ‘ai i le tausaga vevela.

²⁶O sefanai, o le nuu e le fitafita ia, a e fai i le papa o latou fale.

²⁷E leai se tupu i sē akerise, a e o atu i latou o vaevaeina uma lava a latou ‘au.

²⁸O le pili, e tago atu ona lima, e i ai foi o ia i maota o tupu.

²⁹E tolu mea e matagofie ona savavali; e fa foi mea ua o faamatagofie;

³⁰o leona e malosi i manu vaefa; e le liliu foi o ia i luma o se tasi;

³¹o le solofanua, ma le ‘oti poa, ma le tupu e leai se tulai atu ia te ia;

³²afai ua e amio faavalea ina ua e faamaualuga, afai foi ua e manatu i se mea leaga, tuu atu ia lou lima i lou gutu.

³³A tatao suāsusu, e maua ai le suāsusu to‘a; a oomi le isu, ua sau ai le toto; a faaoso le ita ua tupu ai le misa.