Read Samoan Old Version Bible – O LE TUSI PAIA FAATAOTO, 6 Bible Online

FAATAOTO, 6 - Samoan Old Version Bible – O LE TUSI PAIA bible

FAATAOTO, 6

¹Lo‘u atalii e, afai ua fai oe ma moni o lau uo; afai ua fetagofi i lima mo le tagata ese,

²ua maileia oe i upu a lou gutu; ua maua oe i upu a lou gutu.

³O lenei, lo‘u atalii e, ia e faia le mea nei, ina ia laveaiina oe, pe a oo mai le pule a lau uo ia te oe; alu ia, ina ifo, ma e nati atu i lau uo;

⁴aua ne‘i moe ou mata, pe tulemoe ou laumata;

⁵ia e laveaiina oe e oe, e pei o le sevi ai le lima; e pei o le manu foi ai le lima o lē fai manu.

⁶Le paie e, ina e alu i le loi, ia vaavaai i lana amio, ina ia poto ai oe;

⁷e leai sona ta‘ita‘i, po o se leoleo, po o sē pule,

⁸a e saunia e ia ana mea e ‘ai i le tausaga vevela, ma faaputuina ana mea e ‘ai i ona po e selesele ai saito.

⁹Le paie e, e te taoto seia afea? Se‘i e tulai afea ai lou moe?

¹⁰Se‘i toe itiiti sina moe, toe itiiti se matămoe, toe itiiti se piilima e taoto ai,

¹¹a e oo mai lou mativa e pei o le malaga; ma lou le tagolima pei o le tagata ua sauni lana auupega.

¹²O le tagata ulavale, o le tagata agasala, o loo savali ia ma le gutu faapiopio;

¹³e genogeno ona mata; e tautalatala ona vae; e faasino i ona tamatamai lima.

¹⁴Ua i lona loto le faapiopio; na te fai togafiti leaga i aso uma; na te faatupuina maseiga;

¹⁵o le mea lea e faafuasei ai ona oo mai o lona malaia; e faafuasei ona nutimomoia o ia, a e leai se fofo.

¹⁶O mea nei e ono ua inosia e Ieova; o lona fitu foi ua matuā inosia lava e ia;

¹⁷o mata faasiasia, o le laulaufaiva pepelo, ma lima e sasaa le toto o le ua le sala,

¹⁸o le loto e manatunatu i togafiti leaga, o vae e tele vavave ona taufetuli i le leaga,

¹⁹o le molimau pepelo, na te tautala i mea pepelo; ma le na te faatupu maseiga i uso.

²⁰Lo‘u atalii e, ia e tausi i poloaiga a lou tamā; aua foi e te tuulafoaiina le upu e a‘oa‘o atu a lou tinā;

²¹ia fusi ai e le aunoa i lou loto; ia asoa ai i lou ua.

²²A e savali, e ta‘ita‘iina ai oe; a ē moe, e leoleoina ai oe; a ē ala, e tautala ai ma oe.

²³Auā o le poloaiga o le sulu lea; ma le upu e a‘oa‘o atu, o le malamalama lea; o aoaiga foi a‘oa‘oina ai, o le ala o le ola lea,

²⁴ina ia leoleo ia te oe ai le fafine amio leaga, ai le laulaufaiva molemole o le fafine ese.

²⁵Aua ne‘i naunau lou loto i lona lalelei; aua ne‘i maua oe i ona laumata.

²⁶Auā e iu ina toe na o si fāsi areto ona o le fafine talitane; o le avā foi a le tasi tagata na te taumailei le ola aoga.

²⁷E ave ea e se tasi le afi i lona fatafata, a e le mu ai ona ofu?

²⁸Afai e savali se tagata i luga o malala ola, e le mu ai ea ona vae?

²⁹E faapea foi le ua alu atu i le avā a le la te tuaoi; ai se tago ia te ia, e le faasaoina o ia.

³⁰E le inosia le gaoi pe a gaoi o ia e tali ai lona manava, ina ua fia ‘ai;

³¹a e a maua o ia, ona taui atu lea e ia e taifitu; na te avatu ai oloa uma o i lona fale.

³²O lē mulilua i le fafine ua leai sona mafaufau; o le na te faia lea mea, na te faaumatia e ia lona lava ola;

³³na te maua le fasiga ma le faamaina; o lona luma foi e le sōloiesea lea.

³⁴Auā o le fuā o le ita tele lea o le tagata; na te le faasaoina foi o ia i le aso e taui ai ma sui.

³⁵Na te le talia se togiola lava; na te le mafaia foi, e ui lava ina ua e faatele ni mea e avatu ai.