Read Samoan Old Version Bible – O LE TUSI PAIA FAATAOTO, 9 Bible Online

FAATAOTO, 9 - Samoan Old Version Bible – O LE TUSI PAIA bible

FAATAOTO, 9

¹O le poto ua faia e ia lona fale; ua ia talai ona pou e fitu.

²Ua na fasia ana manu; ua na suia lana uaina; ua na laulau atu foi mea i lana laoai.

³Ua ia auina atu lona galu teine; ua tala‘i i mea maualuluga o le aai,

⁴Ai se faigofie, ia afe mai o ia iinei; o le ua leai sona mafaufau, ua ia faapea atu i ai,

⁵O mai ia, ina aai la‘u areto, ma inu i la‘u uaina ua ou suia.

⁶Ia outou tuulafoai atu i e valelea, tou te ola ai; ma ia outou ui atu i le ala e atamai ai.

⁷O le na te aoai atu i lē tauemu e maua e ia le faamāina; ma le la te finau ma le tagata amio leaga e maua a ia le ila.

⁸Aua ne‘i aoai atu i lē tauemu, ne‘i inosia oe e ia; aoai atu i le ua poto, ona alofa mai lea o ia ia te oe.

⁹A‘oa‘o atu i le ua poto e atili poto ai o ia; a‘oa‘o atu i le ua amiotonu e tupu ai pea lona poto.

¹⁰O le mata‘u ia Ieova, o le amataga o le poto lea; ia iloa foi lē Paia, o le atamai lava lea.

¹¹Auā o a‘u e faateleina ai ou aso; e faaopoopoina ai foi tausaga i lou olaga.

¹²Afai e te poto, mo oe lava e te poto ai; afai e te tauemu, na o oe lava e nofo sala ai.

¹³O le fafine valea, ua leoleoa lava ia, e faigofie lava o ia, na te le iloa se mea.

¹⁴Ua nofo o ia i le faitotoa o lona fale, i luga lava o le nofoa i mea maualuga i le aai;

¹⁵ina ia valaau i e ui ane i le ala, o e savavali tonu i o latou ala.

¹⁶O sē faigofie, ia afe mai o ia iinei; o le ua leai sona mafaufau, ua ia faapea atu i ai,

¹⁷E suamalie le vai ua gaoia, e manogi foi le areto ua natia.

¹⁸A ua le iloa e ia o i lea mea agaga o e ua oti; ua i mea maulalo o seoli e ua valaauina e ia.