Read Samoan Old Version Bible – O LE TUSI PAIA FAILAUGA, 10 Bible Online

FAILAUGA, 10 - Samoan Old Version Bible – O LE TUSI PAIA bible

FAILAUGA, 10

¹O lago mamate e elo ai ma masa ai le suāuu manogi a le fai mea manogi; o le valea itiiti foi e leaga ai le ua ta‘ua o le poto ma le mamalu.

²O le loto o le tagata poto ua i lona lima taumatau; a o le loto o le vale ua i lona lima tauagavale.

³A savali le vale i le ala, ua leai sona mafaufau, ua fai atu foi o ia i tagata uma, o ia o le vale.

⁴Afai e tupu le ita o le faipule ia te oe, aua e te tuua le mea ua e i ai; auā o le agamalu e moe ai le ita i agasala tetele.

⁵O le tasi mea leaga ua ou iloa i lalo o le la, o le mea sese e tupu mai i le alii;

⁶ua tofia le valea i mea silisili, a ua nonofo e ua mauoa i le mea maulalo.

⁷Ua ou iloa auauna e tietie i solofanua, a o alii e savavali i le eleele e pei o auauna.

⁸O le na te eli se lua e paū o ia i ai; o ia foi na te lepeti se aupa, e utia o ia e se gata.

⁹O le na te aveesea maa e tiga ai o ia; o le na te isia laau e lavea ai o ia.

¹⁰Afai e foi e matatupa le uamea, a le faamaaia foi e ia lona mata, ona faatele lea i ai o lona malosi; a o le poto, o le mea aoga lea e faatonu a‘i.

¹¹Afai e u se gata, a o le faaoleoleina, ona leai lea o se mea e maua e le na te faaoleoleina.

¹²O upu a le tagata poto o upu alofa ia; a o le gutu o le vale e malaia ai o ia.

¹³O le amataga o upu a lona gutu o le valea lea, o le iuga foi o lana tautala o le valea leaga lea.

¹⁴Ua faateleina foi upu e le vale; e le iloa foi e le tagata se mea e tupu; o ai foi se na te faailoa ia te ia se mea e tupu pe a mavae atu o ia?

¹⁵O le galuega a e valelea ua lailoa ai i latou; auā e leai so latou e iloa ona alu i le aai.

¹⁶Le nuu e, oi talofa ia te oe pe a se tama lou tupu, ua ala aai foi ou alii!

¹⁷Le nuu e, amuia oe pe a fai mou tupu le alo o se alii, e aai foi ou alii i le itu aso e tatau ai, ia malolosi ai, a e le ina ia onā ai.

¹⁸O le paie tele e pala ai le paelaau, o le le tago foi o lima i mea, e tutulu ai le fale.

¹⁹Ua latou faia le tausamiga e featani ai, o le uaina foi e fiafia ai tagata ola; a o tupe e aoga i mea uma.

²⁰Aua e te fetuu i le tupu i lou lava manatu; aua foi e te fetuu i le mauoa i lou lava potu moe; auā e ave le leo e se manu lele, e faailoa atu foi le upu e le mea ua fai apaau.