Read Samoan Old Version Bible – O LE TUSI PAIA FAILAUGA, 12 Bible Online

FAILAUGA, 12 - Samoan Old Version Bible – O LE TUSI PAIA bible

FAILAUGA, 12

¹O lenei, ia e manatua le na faia oe i ona po o lou taulealea, a o lei oo mai aso leaga, a o lei oo mai foi tausaga e te faapea ai, E leai so‘u fiafia i ai;

²a o lei faapouliuligia le la, ma le malamalama, ma le masina, ma fetu, ma ua le foi mai ao pe a mavae le ua;

³o le aso e tete ai o e leoleo i le fale, ma faano‘uno‘u ai tagata malolosi, ma lē toe galulue e ua olo, auā ua toaitiiti, ma faapouliuligia e o vaai i faamalama,

⁴ma punitia ai faitotoa i le ala, ina ua itiiti le leo o le olo, e tulai ai foi o ia ina ua tausani o manu, e vāivai ai foi teine fai pesega uma;

⁵e fefefe ai foi i latou i mea maualuluga, ma matatau ai i le ala; pe a fuga mai le sekati, ma fai le sē ma mea mamafa, ma ua leai lava se toe manao; auā a alu le tagata i lona fale faavavau, e feoai foi ē taufaitagitu‘i i le ala;

⁶a o lei faamalūina le maea ario, po o ta‘e le ipu auro, po o nuti le kate i le vaipuna, po o gausia le mea taavili i le vaieli;

⁷ma toe foi atu le efuefu i le eleele e pei ona i ai ia, ma toe foi atu le agaga i le Atua o le na foaiina mai ai.

⁸Ua faapea mai le Failauga, E matuā faatauvaa, e faatauvaa mea uma lava.

⁹Na sili le poto o le Failauga, o le mea lea na sili ai lona a‘oa‘o atu i tagata ia popoto; na ia mafaufau foi, ma suesue, ma saunia faataoto e tele.

¹⁰Na sailia e le Failauga ia maua upu e faafiafia a‘i; o mea ua tusia foi e tonu ia, o upu moni lava.

¹¹O upu a e popoto e pei o tui ia, po o fao ua faamauina, o matai o faapotopotoga ua tofia ia e le leoleo e toatasi.

¹²O lenei foi, lo‘u atalii e, ia a‘oa‘oina oe e i latou; e leai se iuga i tusi o tusi e tele; o le suesue tele foi i upu e vaivai ai le tino.

¹³Se‘i tatou faalogo ia i le iuga o ia mea uma, Ia e mata‘u i le Atua, ma e anaana i ana poloaiga; auā o mea ia e tatau i tagata uma.

¹⁴Auā e faamasinoina e le Atua galuega uma, atoa ma mea lilo uma lava, o mea lelei atoa ma mea leaga.