Read Samoan Old Version Bible – O LE TUSI PAIA FAILAUGA, 3 Bible Online

FAILAUGA, 3 - Samoan Old Version Bible – O LE TUSI PAIA bible

FAILAUGA, 3

¹O le mea ma lona tausaga i mea uma, ma ona lava po i mea uma lava i lalo o le lagi;

²o ona po e fanau mai ai, ma ona po e oti ai; o ona po e totō ai, ma ona po e liai ai le mea ua totōina;

³o ona po e fasioti ai, ma ona po e fofō ai; o ona po e lepeti ai, ma ona po e ati ae ai;

⁴o ona po e tagi ai, ma ona po e ‘ata‘ata ai; o ona po e taufaitagitu‘i ai, ma ona po e sasaa ai;

⁵o ona po e lafoai ai maa, ma ona po e faapotopoto ai maa; o ona po e feasogi ai, ma ona po e le feasogi ai;

⁶o ona po e saili ai, ma ona po e tuu ai ua le iloa; o ona po e tausi ai, ma ona po e lafoai ai;

⁷o ona po e saei ai, ma ona po e su‘i ai; o ona po e faalologo ai, ma ona po e tautala ai;

⁸o ona po e alofa ai, ma ona po e ‘ino‘ino ai; o ona po o le taua, ma ona po o le nofo lelei.

⁹Se a le mea ua maua e le faigaluega i le mea e galue ai o ia?

¹⁰Ua ou iloa le galuega ua tuuina mai e le Atua i tagata, latou te tiga ai.

¹¹Ua faia e ia mea uma lava e matagofie i o latou lava tausaga; ua tuuina foi e ia le manatu i le lalolagi i o latou loto; a e le mailoa e le tagata le galuega ua faia e le Atua mai le amataga e oo i le gataaga.

¹²Ua ou iloa e leai se mea lelei ia te i latou, na ona ia olioli le tagata, ma ia fai mea lelei i lona olaga nei.

¹³I le ma lea, ia taitasi le tagata ma ‘ai, ma inu, ma fiafia i mea lelei i ana galuega uma; o le mea foaiina mai lea e le Atua.

¹⁴Ua ou iloa, o mea uma e faia e le Atua e faavavau ia; e le mafai ona faaopoopo i ai o se mea, e le mafai foi ona ave ese i ai o se mea; ua faia foi e le Atua ina ia matatau tagata i ona luma.

¹⁵O le mea sa i ai anamua, ua i ai nei lea; o le mea foi o le a i ai i se aso, o le mea lea sa i ai anamua; e suesue foi e le Atua le mea ua mavae.

¹⁶Ua ou toe iloa foi i lalo o le la le mea e faamasino ai, ua i ai le amio leaga; ma le mea e amiotonu ai, ua i ai le amio leaga.

¹⁷Ona ou faapea ifo lea i lo‘u loto, E faamasinoina e le Atua le ua amiotonu atoa ma le ua amio leaga; auā e taitasi ma ona lava po i mea uma ma galuega uma i lea mea.

¹⁸Ua ou faapea ifo i lo‘u loto i le tu o tagata, e tofotofo le Atua ia te i latou, ina ia iloa e i latou e tusa i latou ma manu.

¹⁹Auā o le mea e oo i tagata e oo foi lea i manu; e tasi lava le mea e oo ia te i latou; e pei ona oti o le tasi, e faapea foi ona mate o le tasi; e tasi lava le mānava ia te i latou uma; e leai lava se mea e sili ai le tagata i le manu; auā e faatauvaa uma lava.

²⁰E oo uma lava i le mea e tasi; e mai le efuefu uma lava, e toe foi atu foi uma lava i le efuefu.

²¹O ai se na te iloa le agaga o le tagata e alu ae i lugā? po o le agaga o le manu e alu ifo i lalo i le eleele?

²²Ona ou iloa lea ua leai se mea e sili ona lelei i le tagata, na ona ia olioli o ia i ana lava galuega; auā o lona tofi lea; auā o ai ea se na te faafoi mai ia te ia ina ia iloa le mea o le a tupu pe a mavae atu o ia?