Read Samoan Old Version Bible – O LE TUSI PAIA FAILAUGA, 4 Bible Online

FAILAUGA, 4 - Samoan Old Version Bible – O LE TUSI PAIA bible

FAILAUGA, 4

¹Ona ou toe manatunatu lea i sauaga uma ua faia i lalo o le la; faauta foi i loimata o e ua sauaina, ua leai foi se na te faamafanafanaina i latou; ua lima malosi foi e na saua ia te i latou; a ua leai se na te faamafanafanaina i latou.

²Ona ou faamanuia ai lea i e ua oti, e ua oti anamua, e sili i e ola, o i latou o e ola mai nei.

³A e sili ona manuia ia te i laua o le ua le fanau mai, o le ua le iloa le galuega leaga ua faia i lalo o le la.

⁴Ona ou manatunatu lea i galuega tiga uma, ma galuega manuia uma; a ua matauaina le manuia uma; a ua matauaina le tagata ona o lea mea e lē la te tuaoi. O le mea faatauvaa foi lea, ma le ‘ai i le matagi.

⁵E piilima le vale, e ‘ai foi e ia lona tino.

⁶E sili ona lelei o se luutaga e tasi ma le filemu, i luutaga e lua ma le tiga, ma le ‘ai i le matagi.

⁷Ona ou toe manatunatu lea i mea faatauvaa i lalo o le la.

⁸O loo i ai le tasi tagata ua leai sē la te toalua; e leai foi sona ataliii, po o se uso; a ua leai se iuga i lana galuega uma, e le mălie foi ona mata i vaai i le oloa; a e le faapea o ia, Ou te galue ea mo ai, ma ou faamativa ai ia te au i mea lelei? O le mea faatauvaa foi lea, o le mea leaga lava.

⁹E sili ona lelei o le toalua i le toatasi; auā ua ia te i laua le taui lelei i la la galuega.

¹⁰Auā afai e paū le tasi e faatuina o ia i luga e lē la te toalua; oi talofa foi i le ua toatasi pe a paū, auā e leai sē la te toalua e faatu ia te ia i luga.

¹¹Afai foi e taooto faatasi le toalua, e mafanafana ai i laua; a e faapefea ona mafanafana o le ua toatasi?

¹²Afai foi e faamanumalo mai se tasi i so laua, e teteeina atu o ia e le toalua; o le maea foi e sāutuatolu e le vave motusia.

¹³E sili ona lelei o le tama e mativa a e poto, i le tupu e toeaina a e valea, ma le le toe fia a‘oa‘oina.

¹⁴Auā e sau o ia nai le fale puipui e fai ma tupu; auā foi o le ua fanau mai i lona malo e mativa ia.

¹⁵Na ou iloa o e ola uma lava, o e savavali i lalo o le la, e faatasi ma le tama a aupito ane, o le a fai mona sui.

¹⁶E le masino le vao tagata uma, o i latou uma na fai o ia mo latou ta‘ita‘i; o e mulimuli mai foi latou te le fiafia ia te ia. O le mea faatauvaa foi lea, ma le ‘ai i le matagi.