Read Samoan Old Version Bible – O LE TUSI PAIA FAILAUGA, 5 Bible Online

FAILAUGA, 5 - Samoan Old Version Bible – O LE TUSI PAIA bible

FAILAUGA, 5

¹Ia e faaeteete i ou vae pe a e alu i le fale o le Atua; ia e faalatalata atu foi e faalogologo, a e aua le faalatalata atu e avatu le taulaga a e valelea; auā latou te le iloa ua latou faia le mea leaga.

²Aua le faavave lou gutu, aua foi le faataalise lou loto e fai atu se upu i luma o le Atua; auā o i le lagi le Atua, a ua e i le lalolagi; o le mea lea ia itiiti ai au upu.

³Auā o le tele o mea e fai e tupu ai le miti; o le tele foi o upu e iloa ai le leo o le vale.

⁴Pe a e tauto i se tautoga i le Atua, aua e te faatuai ona avatua; auā e le fiafia lava o ia i e ua valelea; ina e faia le mea ua e tauto ai.

⁵E sili ona lelei ona e le tauto, i lou tauto a e le avatua.

⁶Aua nei e agasala i lou gutu; aua foi e te fai atu i luma o le agelu, O le mea sese lea. Se a le mea e toasa mai ai le Atua i lou leo, ma faaleaogaina e ia le galuega a ou lima?

⁷Auā o le tele o moemiti, ma le tele o upu, o i ai mea faatauvaa; a ia e mata ‘u i le Atua.

⁸Afai ua e iloa atu ona sauaina o le ua mativa, ma le fao mea i le faamasinoga ma le faatonuga i se itu malo, aua e te ofo i lea mea; auā o loo vaai o le ua sili i lea tagata sili; o loo silasila foi le ua silisili ia te i laua.

⁹O mea e tutupu i le laueleele, mo tagata uma ia; o le tupu foi e maua e ia ana mea mai le fanua.

¹⁰O le ua manao i le ario, e le mălie o ia i le ario; o le ua manao foi i le oloa tele, e leai sana mea e maua ai; o le mea faatauvaa foi lea.

¹¹Pe a faateleina mea lelei, e faatoateleina foi o e aai ai; se a foi se mea ua maua ai e i latou e a latou ia mea, ua na ona vaai i ai o latou mata?

¹²E lelei le moe o lē faigaluega, pe itiiti, pe tele ana mea e ‘ai; a o le ma‘ona o le mauoa e le mafai ai ona moe o ia.

¹³Ua i ai le mea leaga e tiga ai ua ou iloa i lalo o le la, o le oloa tele ua tausia mo latou e a latou le oloa e leaga ai i latou.

¹⁴Auā e faaumatia ia oloa i le galuega leaga; ua fanaua foi e ia sona atalii, ua le ia te ia foi se mea.

¹⁵E pei ona sau o ia o le lavalavā mai le manava o lona tinā; e toe foi atu lava o ia e faapei ona ia sau; e le ave foi e ia se mea ai lana galuega e alu ma ia.

¹⁶O le mea leaga foi lenei e tiga ai, e pei ona sau o ia, e faapea lava ona foi atu o ia; se a foi se mea ua maua e le tagata ua galue mo le matagi?

¹⁷O loo ‘ai foi o ia i ona aso uma i le pouliuli, ma le tiga tele, ma le ma‘i, ma le ita.

¹⁸Faauta i le mea ua ou iloa; o le mea lelei ma le matagofie i le tagata e ‘ai, ma inu, ma fiafia i le lelei mai ana galuega uma na te faia i lalo o le la, i aso uma o lona ola ua foaiina e le Atua ia te ia; auā o mea ia e fai māna.

¹⁹E taitasi foi le tagata ua foaiina e le Atua ia te ia le tamaoaiga ma le oloa tele, ma ua foai e ia ia te ia ia mafai ona ‘ai ai; ia fai foi lona tofi, ma olioli i lana galuega; o le mea foaiina e le Atua lea.

²⁰Auā e le manatua tele e ia o aso o lona ola, auā ua foai mai e le Atua le olioli i lona loto.