Read Samoan Old Version Bible – O LE TUSI PAIA FAILAUGA, 6 Bible Online

FAILAUGA, 6 - Samoan Old Version Bible – O LE TUSI PAIA bible

FAILAUGA, 6

¹O loo i ai le mea leaga ua ou iloa i lalo o le la, e toatele foi lea i tagata;

²o le tagata ua foaiina i ai e le Atua le tamaoaiga, ma le oloa tele, ma le mamalu, e le mativa foi o ia i se mea o mea uma e manao i ai o ia, a ua le foaiina e le Atua ia te ia ia mafai ona ‘ai ai, a e ‘aina e le tagata ese. O le mea faatauvaa lea, o le ma‘i leaga lea.

³Afai e fanaua e se tagata le toaselau, e tele foi tausaga e ola ai o ia, e tele foi aso o ona tausaga, a e le mălie lona loto i le lelei, ma ua leai foi sona tuugamau; ou te faapea ifo, E sili ia te ia le ua fanau le au.

⁴Auā ua sau o ia o faatauvaa, ua alu atu foi o ia ma le pouliuli, ua ufitia foi lona igoa i le pouliuli;

⁵ua le iloa foi e ia le la, ua le iloa lava se mea; ua sili le filemu o lena i lo le tasi.

⁶Afai foi e ola o ia i tausaga e lua afe, e le iloa lava e ia se manuia; e le o atu ea tagata uma i le mea e tasi?

⁷O galuega uma a le tagata mo lona gutu lea, a e le mălie lava le manao.

⁸Se a foi le mea ua i ai i le tagata poto e sili i la le vale? se a le mea ua e ai i le mativa, ua iloa e savali i luma o tagata ola?

⁹E sili ona lelei o le mea ua maua mai, i le mea ua manao i ai le loto; o le mea faatauvaa foi lea, ma le ‘ai i le matagi.

¹⁰O le ua i ai nei, ua uma ona faaigoaina o ia i lona igoa, ua iloa foi o ia o le tagata; e le mafai foi ona finau o ia ma le ua sili lona malosi i lona.

¹¹E tele lava mea e faateleina ai mea faatauvaa, se a le mea ua maua ai e le tagata?

¹²auā o ai se na te iloa le mea e lelei ai le tagata i lenei olaga, i nai aso uma o lona ola faatauvaa, e mavae ese ia te ia e pei o se ata? po o ai foi se na te faailoa atu i le tagata le mea e tupu i lalo o le la pe a mavae atu o ia?