Read Samoan Old Version Bible – O LE TUSI PAIA FAILAUGA, 8 Bible Online

FAILAUGA, 8 - Samoan Old Version Bible – O LE TUSI PAIA bible

FAILAUGA, 8

¹O ai e pei o le tagata poto? o ai foi se na te iloa le faamatalaga o se mea? O le poto o le tagata e malamalama ai ona mata; ua liliu ai foi ona mata saua.

²Ou te fai atu, ia e anaana i le poloaiga a le tupu, ona o le tauto foi i le Atua.

³Aua e te faavave ona e alu ese i ona luma; aua e te finau i se mea leaga; auā o mea uma e finagalo i ai o ia e faia e ia.

⁴O le mea ua i ai le poloaiga a le tupu, o le mea lea ua i ai le pule; o ai foi se na te fai atu ia te ia, Se a le mea ua e faia?

⁵O le na te anaana i le poloaiga e le iloa e ia se mea leaga; ua iloa foi i le loto o le tagata poto le tausaga ma le tonu.

⁶Auā ua i ai i mea taitasi o ona po ma le tonu; a e tele pea lava le leaga ua i le tagata;

⁷auā e le iloa e ia mea e tutupu; auā o ai se na te faailoa atu ia te ia ona po e tutupu ai?

⁸E leai se tagata ua i ai le pule i le agaga e taofi ai le agaga; e leai foi se pule ia te ia i le aso e oti ai; e leai lava se aueseina atu i lea taua; o le amio leaga foi e le laveaiina ai o e ua faia.

⁹Ua ou iloa nei mea uma, ua ou manatu foi i lo‘u loto i galuega uma ua faia i lalo o le la; e i ai ona po e pule ai le tasi tagata i le tasi, e leaga ai o ia lava.

¹⁰Ona ou iloa ai lea e ua amio leaga ua tanumia; na o mai foi i latou, ma o ese atu i le mea paia; na faagalogaloina foi i latou i le aai na latou faapea ai; o le mea faatauvaa foi lea.

¹¹Auā ua le vave faaootia le sala i le amio leaga, o le mea lea ua matuā naunau ai loto o tagata e fai mea leaga.

¹²E ui lava ina faaselau ona fai o mea leaga o le ua agasala, ma ua faafualoaina lona ola; a ua ou iloa lava e manuia e ua matatau i le Atua, o e matatau i ona luma.

¹³A e le manuia le ua amio leaga, e le faafualoaina foi ona aso, ua pei o se ata; auā ua le mata‘u o ia i luma o le Atua.

¹⁴Ua i ai lenei mea faatauvaa ua faia i le lalolagi; ua i ai e ua amiotonu, ua oo i ai mea e tatau i le galuega a e amio leaga; ua i ai foi o e ua amio leaga, ua oo i ai mea e tatau i le galuega a e amiotonu; ua ou faapea ifo, O le mea faatauvaa foi lea.

¹⁵Ona ou viia ai lea o le olioli; auā ua leai se mea lelei i le tagata i lalo o le la, na ona ia ‘ai, ma inu, ma olioli; auā e tumau lea ia te ia mai lana galuega, i aso o lona ola, ua foaiina mai e le Atua ia te ia i lalo o le la.

¹⁶Ua faasaga lo‘u loto ia iloa le poto, ia iloa foi le galuega ua faia i le lalolagi; auā foi o loo i ai le ua le iloa sina moe i ona mata i le ao atoa ma le po;

¹⁷ona ou iloa ai lea o galuega uma a le Atua, e le mafaia e le tagata ona iloa o le galuega ua faia i lalo o le la; auā e ui lava ina tiga se tagata i saili, a e le iloa e ia; i le ma lea, a faapea ifo se tagata poto, o le a na iloa, e le mafai ona iloa e ia.