Read Samoan Old Version Bible – O LE TUSI PAIA FAILAUGA, 9 Bible Online

FAILAUGA, 9 - Samoan Old Version Bible – O LE TUSI PAIA bible

FAILAUGA, 9

¹Na ou manatunatu lava i lo‘u loto i na mea uma, na ou matuā suesue foi na mea uma; ua i le aao o le Atua e ua amiotonu ma e ua popoto, atoa ma a latou galuega; e le iloa foi e tagata le alofa po o le ita i mea uma i o latou luma.

²E tutusa ona oo o mea uma i tagata uma; e tasi lava le mea e oo i le ua amiotonu ma le ua amio leaga, i le ua lelei, ma le ua mamā ma le ua le mamā, o le na te faia taulaga, ma le na te le faia taulaga; e pei ona oo i le tagata amio lelei, e faapea foi ona oo i le tagata agasala; e pei ona oo i le na te tauto, e faapea foi ona oo i le ua mata‘u i le tauto.

³Ua i ai lenei mea leaga i mea uma ua faia i lalo o le la, e oo le mea e tasi i tagata uma; ua tumu foi loto o tagata i le leaga, ua i ai foi le valea i o latou loto i o latou olaga nei, mulimuli ane ua latou o atu i e ua oti.

⁴Auā o le ua faatasi i e ua ola uma, ua ia te ia le faamoemoe; auā e sili ona lelei o le ulī ua ola i le leona ua mate.

⁵Auā o e ua ola, ua latou iloa e oti i latou; a o e ua oti, latou te le iloa se mea; ua leai foi se toe totogi ia te i latou; auā ua faagalogaloina i latou.

⁶O lo latou alofa foi, ma lo latou ita, ma lo latou mataua, ua mavae lava ia; ua le toe aiā i latou e faavavau i mea uma ua faia i lalo o le la.

⁷Ina alu ia, ina ‘ai i lau mea e ‘ai ma le olioli, ina inu foi ia i lau uaina ma le loto fiafia; auā o loo fiafia nei le Atua i au galuega.

⁸Ia sinasina ou ofu e le aunoa; aua foi le aunoa le suāuu i lou ulu.

⁹Ia e fiafia i lou ola faatasi ma le avā ua e alofa i ai, i aso uma o lou ola faatauvaa, ua foaiina e le Atua ia te oe i lalo o le la, o ou aso faatauvaa uma; auā o lou tofi lea i lenei olaga ma lau galuega ua e galue ai i lalo o le la.

¹⁰O mea uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.

¹¹Ua ou toe iloa foi i lalo o le la, ua le sini i le tausinioga e ua tele vavave, ua le malo i le taua e ua malosi, ua le i ai foi i e ua popoto le mea e ‘ai, ua le i ai i e ua faautauta le oloa tele, ua le i ai foi i e ua atamamai le alofaina mai; a o le tausaga ma le mea e tupu ai e oo ia te i latou uma.

¹²Auā foi e le iloa e le tagata lona tausaga; e pei ona maua o i‘a i le upega e leaga ai, e pei ona maua foi o manu felelei i le mailei; e faapea foi ona maileia o tagata i le tausaga leaga, pe a oo faafuasei mai ai ia te i latou.

¹³Ua ou iloa foi lenei poto i lalo o le la, ua tele foi lea i lo‘u manatu;

¹⁴o si aai itiiti, e toaitiiti foi tagata na i ai; na alu atu foi i ai le tupu tele, na ia vagaia, na ia fai foi ‘olo tetele e faafeagai i ai;

¹⁵na iloa ai foi le tasi tagata mativa, a e poto; na ia faasaoina foi le aai i lona poto; a ua leai se tagata na ia manatua lea tagata mativa.

¹⁶Ona ou faapea ifo lea, E sili ona lelei o le poto i le malosi; a e inosia le poto o le mativa, ua le faalogoina foi ana upu.

¹⁷E sili ona faalogoina upu filemu a e popoto, i le alaga a le faipule valea.

¹⁸E sili ona lelei o le poto i auupega o le taua; a e māumau i le tagata agasala e toatasi mea lelei e tele.